Рыкарда Мільёры: Абяцанні ЦВК праверым на выбарчых участках

Назіральнікі станоўча ацэняць працу камісій «у духу адкрытасці і празрыстасці» пры падліку галасоў.

Пра гэта ў інтэрв'ю БелаПАН заявіў прэзыдэнт Парламенцкай асамблеі (ПА) АБСЕ Рыкарда Мільёры.

«Мы сапраўды доўга гаварылі са старшынёй ЦВК (на сустрэчы 10 верасня) на тэмы, якія датычацца беларускага выбарчага заканадаўства. Самы важны момант складаўся ў абяцанні, якое было нам дадзена, аб допуску міжнародных назіральнікаў на выбарчых участках туды, дзе будзе праводзіцца падлік і апрацоўка бюлетэняў», - распавёў Мільёры.

У большасці выпадкаў у апошнія гады на беларускіх выбарах «мы бачылі тое, чаго не назіраецца практычна ні ў адной іншай краіне: у момант падліку галасоў назіральнікам прапаноўвалі адысці на дыстанцыю 15-20 метраў ад стала, дзе праводзілася апрацоўка дадзеных», - адзначыў прэзідэнт ПА АБСЕ.

«Калі я ў пачатку жніўня ў Рыме сустракаўся з міністрам Сяргеем Мартынавым, ён мне сказаў, што гэта адбывалася з-за недастатковага разумення нейкіх момантаў старшынямі ўчастковых камісій», - сказаў Мільёры.

Акрамя таго, паведаміў ён, на сустрэчы з кіраўніком ЦВК Лідзіяй Ярмошынай прадстаўнікі ПА АБСЕ хацелі даведацца, чаму так мала прадстаўнікоў апазіцыі ўключана ў выбарчыя камісіі, і якія прычыны адмовы ў рэгістрацыі кандыдатам лідэра руху «За свабоду» Аляксандра Мілінкевіча, кандыдата ў прэзідэнты на выбарах 2006 года.

«Што датычыцца адмовы ў рэгістрацыі спадару Мілінкевічу, нам патлумачылі, што дакументы, прадстаўленыя кандыдатам, не ў поўнай меры адпавядалі неабходным нормам. Мы сустракаліся і са спадаром Мілінкевічам учора. Ён патлумачыў нам, што не збіраўся нават падаваць скаргу, так як лічыць адмову ў рэгістрацыі палітычна абгрунтаваным і прынятым загадзя рашэннем», - распавёў кіраўнік ПА АБСЕ.

Што датычыцца недастатковай прысутнасці прадстаўнікоў апазіцыі ў выбарчых камісіях, то, па словах Мільёры, у ЦВК ім патлумачылі, што заявак ад апазіцыянераў «было вельмі мала, а пададзеныя заяўкі былі задаволеныя».

Рыкарда Мільёры нагадаў, што 23 верасня за ходам выбараў у Беларусі будуць назіраць каля 90 назіральнікаў ад ПА АБСЕ, прыбудуць таксама кароткатэрміновыя назіральнікі ад Бюро па дэмакратычных інстытутах і правах чалавека (БДІПЧ) АБСЕ.

«Мы спадзяемся, што ў дзень выбараў ахопім каля 10-15% з больш чым 6000 выбарчых участкаў у Беларусі, непасрэдна праверым, ці будзе доступ да стала падліку бюлетэняў, ці будзе празрыстае галасаванне без якога-небудзь ціску. Добрыя намеры старшыні ЦВК мы праверым непасрэдна на месцах. Мы ў Італіі кажам: «Калі гэта ружы, то рана ці позна яны заквітнеюць». Пакуль мы заўважылі толькі шыпы», - падкрэсліў Рыкарда Мільёры.

У якасці прыкладу такіх «шыпоў» ён назваў наяўнасць у Беларусі палітвязняў. «Калі ў турме знаходзяцца верагодныя кандыдаты на ўдзел у выбарах, зразумела, што гэта ўжо нейкае абмежаванне. Гэта датычыцца як сітуацыі з Юліяй Цімашэнка ва Украіне, так і, напрыклад, са Зміцерам Дашкевічам у Беларусі, або падобнай сітуацыі ў любой іншай краіне», - адзначыў прэзідэнт ПА АБСЕ.

Мільёры паведаміў, што прадстаўнікі ПА АБСЕ прасілі аб магчымасці сустрэцца з беларускімі палітвязнямі. «Я прасіў аб такой магчымасці ў міністра Мартынава падчас нашай сустрэчы ў Рыме. Пакуль мы не атрымалі адказу. Але вельмі спадзяемся, што да выбараў мы яго атрымаем», - сказаў прэзідэнт ПА.

Пры гэтым ён удакладніў, што каардынатар місіі назіральнікаў ПА АБСЕ, кіраўнік камітэта па правах чалавека Матэа Мекачы ў выпадку атрымання такога дазволу «гатовы прыехаць у любы беларускі горад у любы момант».

Рыкарда Мільёры таксама падкрэсліў: ПА АБСЕ паважае беларускае заканадаўства, але спадзяецца, што «будуць выкананыя абавязацельствы ў дачыненні да міжнародных парламентарыяў, якія сюды запрошаныя для назірання за выбарамі».

Сёння прадстаўнікі ПА АБСЕ пакінуць краіну.