Белстат: Абваліліся асноўныя сацыяльна-эканамічныя паказчыкі

Белстат апублікаваў сёння асноўныя сацыяльна-эканамічныя паказчыкі Беларусі за студзень - жнівень 2012 года.

Амаль усе яны горш аналагічных дадзеных за студзень - ліпень 2012 года.

Так, тэмп росту ВУП знізіўся са 102,8% у студзені - ліпені да 102,5% у студзені - жніўні. Гэта азначае, што ў жніўні беларуская эканоміка дадала усяго 0,4% у параўнанні з жніўнем мінулага года, піша onliner.by.

Знізіліся і тэмпы росту вытворчасці прамысловай прадукцыі - са 108,6 да 108,1%, а таксама прадукцыі сельскай гаспадаркі - са 112,3 да 107,1%.

Таксама знізіўся аб'ём грузаперавозак: калі ў студзені - ліпені 2012-га ён складаў 99% да аналагічнага перыяду мінулага года, то ў студзені - жніўні 2012-га ён знізіўся да 98,7%.

Упэўнены рост дэманструе толькі рознічны тавараабарот - са 110% у студзені - ліпені да 110,5% у студзені - жніўні, і індэкс спажывецкіх коштаў - са 112% у ліпені 2012-га (да снежня 2012-га) да 114,6% у жніўні 2012-га.

Нагадаем, менавіта ў жніўні быў спынены галоўны лакаматыў росту беларускай эканомікі: схема экспарту растваральнікаў без выплаты пошлін у бюджэт РФ.