Станіслаў Багданкевіч: Раздача зямлі - злачынства супраць народа

Беларуская зямля з'яўляецца нацыянальным здабыткам, а не асабістай уласнасцю Лукашэнкі.

Былы старшыня праўлення Нацыянальнага банка Беларусі Станіслаў Багданкевіч пракаментаваў сайту charter97.org бязвыплатную перадачу беларускіх зямель на 99 гадоў дзяржаве Катар па жаданні Лукашэнкі.

«Калі гэта праўда, то ідзе раздача беларускіх зямель замежнікам. Гэта недапушчальна! Гэта нацыянальны здабытак, а не асабістая ўласнасць Лукашэнкі», - сказаў Станіслаў Багданкевіч.

Былы кіраўнік Нацбанка адзначыў, што такія пытанні неабходна абмяркоўваць у грамадстве.

«Калі б у нас быў парламент, то гэта павінна было абмяркоўвацца там. Гэта злачынства супраць нашага народа, супраць дзяржавы», - заявіў Станіслаў Багданкевіч.

Нагадаем, 17 верасня ў распараджэнні незалежных СМІ апынуўся дакумент, які сведчыць аб беспрэцэдэнтнай перадачы зямель Менскай вобласці Катару для будаўніцтва паляўнічых угоддзяў. Да канца 2012 года, згодна з указам Лукашэнкі, дзяржаве Катар павінны быць перададзены бязвыплатна вялікія ўчасткі зямлі ў Лагойскім і Смалявіцкім раёнах Менскай вобласці пад будаўніцтва рэзідэнцыі і паляўнічых вальераў тэрмінам на 99 гадоў.