Міністэрства аховы здароўя ўхваліла: атручваць беларусаў можна

Міністэрства аховы здароўя знізіла патрабаванні да вытворцаў канцэнтратаў.

Спрошчаны санітарна-эпідэміялагічныя патрабаванні для арганізацый, якія вырабляюць харчовыя канцэнтраты.

Дадзенае рашэнне ўтрымліваецца ў пастанове міністэрства аховы здароўя N136, перадае «Інтэрфакс».

У прэс-рэлізе Міністэрства аховы здароўя ўказана, што новыя нормы прыняты «з мэтай стварэння спрыяльнага інвестыцыйнага клімату, садзейнічання выпуску прадукцыі, якая адпавядае сусветным стандартам якасці і бяспекі, забеспячэння экспарту беларускай прадукцыі, недапушчэння паступлення на рынак небяспечных і недабраякасных харчовых прадуктаў і харчовай сыравіны».

Таксама там адзначана, што з новых нормаў выключаны патрабаванні ўзгаднення розных стадый вытворчасці, пачынаючы з будаўніцтва. Акрамя таго, выключаная залішняя дэталізацыя санітарна-эпідэміялагічных патрабаванняў да вытворчасці гарбаты, у тым ліку да вытворчых, дапаможных і бытавых памяшканняў, абсталявання, тэхналогій вытворчасці, матэрыялаў, транспарціроўцы і захоўвання, у частцы, якая не пагаршае бяспеку харчовай сыравіны і гатовай прадукцыі.

«Увядзенне ў дзеянне сапраўдных санітарных норм і правілаў дазволіць палегчыць дзейнасць арганізацый усіх форм уласнасці, якія спецыялізуюцца ў галіне вытворчасці харчовых канцэнтратаў», - адзначана ў прэс-рэлізе.

Раней у Беларусі былі спрошчаны аналагічныя патрабаванні для вытворцаў марозіва, гарбаты, хлеба і кандытарскіх вырабаў.