Сяргей Грыц: Стукнулі кулаком у правае вока, разбілі акуляры
63- 18.09.2012, 15:46
Фатограф Associated Press распавёў аб сённяшнім затрыманні каля ўніверсама «Фрунзенскі».
«Я атрымаў удар кулаком у правае вока, пры гэтым мне разбілі акуляры», - распавёў Сяргей Грыц, які разам з калегамі быў жорстка затрыманы сёння на пікеце актывістаў моладзевай арганізацыі «Zмена», піша «Наша Нiва».
«Вельмі груба валаклі ў аўтобус. Усіх - актывістаў і прэсу. Вырывалі з рук апаратуру. Пры гэтым жорстка абрывалі ўсе спробы высветліць, хто яны такія, і чаму затрымліваюць журналістаў», - кажа фотакарэспандэнт.
Паводле яго слоў, у аўтобусе невядомыя ў цывільным адразу ж забралі тэлефоны ў тых, хто спрабаваў тэлефанаваць. У аддзяленні міліцыі ўсіх затрыманых змясцілі ў актавай зале, рассадзіўшы іх на адлегласці адзін ад аднаго. Апаратуру адабралі адразу ж і склалі яе на адным са сталоў.
«Я правёў дзве гадзіны ў розных кабінетах. У мяне нічога ніхто не пытаўся. Забралі пашпарт і, відавочна, самі даведаліся, хто я такі», - сказаў Сяргей Грыц.
Журналіст кажа, што яго з калегамі адпусцілі без складання пратаколаў. Апаратуру яму вярнулі, але здымкі з акцыі былі выдаленыя.
Цяпер Сяргей Грыц вырашае, як будзе рэагаваць на сённяшнія падзеі і ці будзе здымаць пабоі.
Нагадаем, сёння каля ўніверсама «Фрунзенскі» ў Менску актывісты моладзевай арганізацыі «Zмена» збіраліся правесці чарговы пікет з заклікам байкатаваць «выбары».
Маладыя людзі зладзілі сімвалічную раздачу баршчу.
Пасля пачатку пікету на актывістаў «Zмены» і журналістаў накінуліся людзі ў цывільным, пачалі збіваць і затрымліваць іх.
Фота Reuters