Мінспорту прапаноўвае вадзіць інтурыстаў па прадпрыемствах

Міністэрства спорту і турызму прапануе развіваць унутраны турызм праз арганізацыю экскурсій на беларускія прадпрыемствы харчовай прамысловасці.

Як заявіў намеснік міністра спорту і турызму Чэслаў Шульга, нядрэнна было б стварыць дэгустацыйныя залы ў Менску, у прыватнасці, на тэрыторыі «Камунаркі». У гэтым выпадку, прадпрыемства магло б арганізаваць экскурсію на вытворчасці для наведвальнікаў, паказаць і распавесці аб працэсе стварэння шакаладных цукерак, правесці дэгустацыю прадукцыі, а таксама прапанаваць яе набыць, паведамляе "Ежедневник".

Аналагічныя экскурсіі і дэгустацыйныя залы можна ствараць і на іншых прадпрыемствах, якія займаюцца вытворчасцю кандытарскіх вырабаў, алкагольных напояў. Міністэрства спорту і турызму прапануе ўсім зацікаўленым прадпрыемствам ажыццявіць гэтую магчымасць і нават гатова аказаць у гэтым падтрымку.

Чэслаў Шульга адзначыў, што ў будучыні плануецца сфарміраваць пералік перспектыўных відаў турызму, якім будзе аказвацца дзяржаўная падтрымка: гэта можа быць як інфармацыйная падтрымка, так і падатковае паслабленне. У цяперашні час эксперты налічылі каля 10 відаў турызму, якім мае сэнс аказаць дапамогу з боку дзяржавы.

Чэслаў Шульга не патлумачыў толькі, навошта камусьці хадзіць на беларускія заводы, калі ўсю іх прадукцыю можна пачаставаць у крамах. Арганізацыя дэгустацыйных залаў яшчэ можа быць апраўданая для вытворцаў элітных спіртных напояў, але ўжо дакладна не для «Камунаркі» і падобных прадпрыемстваў. Праўда, калі ўвесці ў школьныя праграмы абавязковыя экскурсіі па беларускіх прадпрыемствах, як гэта было ў часы СССР, магчыма, краіна і атрымае турыстычны бум. Вось толькі наўрад ці замежных турыстаў мы зможам прывабіць гэтымі дэгустацыйным заламі і экскурсіямі па флагманах беларускай прамысловасці.