Менчукі патрабуюць спыніць «аўкцыён смерці»

Зоаабаронцы збіраюць ахвяраванні на выкуп лася, каб выратаваць яму жыццё.

Стартавала кампанія па збору сродкаў для выкупу ліцэнзіі на адстрэл лася, які разам з іншымі жывёламі «будзе выстаўлены на смяротным аўкцыёне» падчас кірмашу «Паляванне і рыбалоўства. Восень-2012» 28-29 верасня ў Менску. Пра гэта паведаміла прэс-служба экалагічнага таварыства «Зялёная сетка», якое разам з іншымі незалежнымі зоаабаронцамі выступіла адным з ініцыятараў кампаніі, паведамляе БелаПАН.

На аўкцыёне кірмашы будуць прадавацца ліцэнзіі на адстрэл ласёў, казуль і аленяў. Абаронцы жывёл заклікаюць адмяніць яго і лічаць, што «розыгрыш ліцэнзій на забойства жывых істот - неэтычная і жорсткая забаўка». «Падобная праява негуманных адносінаў да жывёл ідзе насуперак з заклікам любіць і паважаць родную прыроду», - лічаць эколагі.

Актывіст «Зялёнай сеткі» Канстанцін Чыкалёў растлумачыў, што «лось гуляе хутчэй сімвалічную ролю, каб прыцягнуць увагу грамадскасці і чыноўнікаў да патрабавання адмяніць аўкцыён».

Збор подпісаў супраць аўкцыёну праходзіць на сайце www.change.org. У анлайн-петыцыі актывісты заклікаюць Міністэрства прыродных рэсурсаў і аховы навакольнага асяроддзя Беларусі адмяніць аўкцыён.

Пачатковы кошт ліцэнзіі на адстрэл лася складзе 6 мільёнаў рублёў. Актывісты заклікалі неабыякавых людзей падпісацца пад петыцыяй і пералічыць грошы. Па словах Чыкалава, сабраныя сіламі валанцёраў сродкі не знікнуць дарма. У выпадку, калі грошы не спатрэбяцца на аўкцыёне, яны будуць пералічаныя прытулкам для бяздомных жывёл і на падтрымку дзікай прыроды ў адным з нацыянальных паркаў.

Рэквізіты плацяжу: ААТ «АСБ Беларусбанк», транзітны рахунак № 3819382105556 на дабрачынны рахунак № 000013 у беларускіх рублях у аддзяленні № 601/601, г. Маладзечна, вул. Прытыцкага, 13. Уклад: 9004-Р. Прызначэнне: Для збору сродкаў на выратаванне дзікіх жывёл на тэрыторыі Беларусі.