Curiosity выявіў на Марсе рэчышча старажытнага ручая (Фота)

Знаходка з'яўляецца першым дакументальным пацвярджэннем здагадак аб наяўнасці ў мінулым вады на Марсе.

На фотаздымках з паверхні Марса бачная скалістая парода, якая складаецца з галькі і пяску. Згодна з НАСА, памер і круглявая форма камянёў сведчаць аб тым, што яны былі прынесеныя менавіта вадой.

На думку навукоўцаў, марсаход знайшоў рэчышча перасохлага ручая.

На спецыяльным брыфінгу для журналістаў спецыялісты НАСА распавялі, што скалістая парода, хутчэй за ўсё, была ўтворана некалькі мільярдаў гадоў таму, але самі водныя патокі маглі існаваць на паверхні Марса на працягу вельмі доўгага часу.

Адзін з галоўных спецыялістаў, які ўдзельнічае ў праекце Curiosity, Біл Дзітрых з Каліфарнійскага універсітэта ў Берклі, сказаў, што жыццёвы цыкл марсіянскіх водных крыніц мог складаць «ад тысяч да мільёнаў гадоў».

Па выглядзе галькі спецыялісты таксама зрабілі выснову, што ручай цёк з хуткасцю 90 сантыметраў у хвіліну, а яго глыбіня складала ў сярэднім каля паўметра.

Марсаход Curiosity здзейсніў пасадку на Чырвонай планеце 6 жніўня. Галоўнай мэтай гэтай місіі НАСА, на якую было выдаткавана каля 2,5 млрд даляраў, з'яўляецца пошук прыкмет жыцця і вывучэнне геалогіі і клімату Марса.

Фінансаванне місіі разлічана на адзін марсіянскі год (роўны двум зямным гадам).

Месца пасадкі Curiosity - кратэр Гейла - было абрана з-за выяўленай у ім раней насыпы, якая можа складацца з ападкавых парод, прынесеных вадой.

Спадарожнікі даўно дасылалі здымкі малюнкаў з паверхні Марса, на якіх былі бачныя каналы, мяркуючы па ўсім, прарэзаныя водным патокам. Знаходка Curiosity з'яўляецца першым дакументальным пацвярджэннем гэтых здагадак, кажуць навукоўцы НАСА.