Затрыманыя ў Смаргоні мастакі абвясцілі галадоўку
11- 3.09.2012, 12:49
(абноўлена) У Смаргоні пачаліся суды над мастакамі «Пагоні».
Першым судзілі Генадзя Драздова, перадае «Радыё Свабода».
Ён запатрабаваў адваката, і па гэтай прычыне разгляд яго справы перанеслі на 11 верасня.
Драздоў - адзін з сябраў аб'яднання «Пагоня», якіх учора арыштавала міліцыя за правядзенне нібыта несанкцыянаванай акцыі з нагоды дня нараджэння Расціслава Лапіцкага, кіраўніка антыкамуністычнага падполля ў пасляваенныя гады.
Сёння ў судзе Генадзь Драздоў азнаёміўся са складзеным на яго пратаколам. Па словах Драздова, яго абвінавачваюць у правядзенні несанкцыянаванага пікету.
Драздоў распавёў, што ў знак незаконнага арышту ўчора ўсё затрыманыя абвясцілі галадоўку.
Сярод затрыманых - мастакі аб'яднання «Пагоня» Генадзь Драздоў, Алесь Цыркуноў, Алесь Пушкін і мясцовы мастак Валянцін Варанішча, а таксама актывіст Уладзімір Шульжыцкі.
Міліцыя затрымала мастакоў, калі яны неслі па горадзе партрэты Лапіцкага.
Па словах Драздова, астатніх затрыманых таксама павінны сёння прывезці ў Смаргонскі раённы суд.