КДБ працягвае атакі на сацыяльныя сеткі
93- 3.09.2012, 20:08
Апазіцыйная група «Надакучыў нам гэты Лукашэнка» зноў пад кантролем спецслужбаў.
Пасля захопу групы, яе выдалення і наступнага аднаўлення, групу ў сацыяльнай сетцы «Укантакце» «Надакучыў нам гэты Лукашэнка» зноў захапілі. Зараз спецслужбы не выдаляюць інфармацыю з супольнасці, але яны ўстанавілі поўны кантроль над групай і публікуюць паклёп на іншых адміністратараў.
Захоп групы стаў магчымы дзякуючы доступу да акаўнта стваральніка групы - да старонкі Алега Шрамука. Верагодна, пасля аднаўлення групы Алега зноў арыштавалі, прымусілі аднавіць сваю старонку (ён яе выдаліў) і з дапамогай акаўнта стваральніка групы спецслужбы ўзялі пад кантроль супольнасць. Незадоўга да захопу групы Алег напісаў у скайпе іншаму адміністратару групы, які знаходзіцца ў Польшчы, што ён баіцца за сябе і што супрацоўнікі КДБ пагражалі яму зламаць ногі. Неўзабаве пасля гэтага Алег Шрамук знік са сувязі і больш у сеціве не з'яўляўся.
Атрымаўшы кантроль над супольнасьцю «Надакучыў нам гэты Лукашэнка», супрацоўнікі спецслужбаў пачалі публікаваць паклёп на іншых адміністратараў групы. У прыватнасці, на сцяне супольнасці з'явіўся запіс, што Максім Чарняўскі працуе на КДБ. Відавочна, што спецслужбы хочуць скампраметаваць адміністратара з дапамогай яго ж групы.
Максім Чарняўскі пракаментаваў сайту charter97.org паўторны захоп групы.
«Сёння раніцай мы ўсе радаваліся, што групу аднавілі. Радасць, на жаль, доўжылася нядоўга - нашу супольнасць зноў захапілі. Па сутнасці, у гэтым вялікай бяды няма - у нас ёсць запасная група «Надакучыў нам гэты Лукашэнка», якую мы стварылі адразу пасля выдалення старой. А паклёп на мяне ў групе выглядае проста смешна - тут і каментаваць няма чаго. Галоўнае, што зараз будзе з арыштаванымі адміністратарамі групы. Я асцерагаюся за жыццё і здароўе Алега Шрамука, Андрэя Ткачова і Паўла Еўцехіева. Што з імі зараз робяць - мне цяжка ўявіць. Але ў тым, што яны падвяргаюцца гвалту і катаванням, я не сумняваюся», - сказаў Максім Чарняўскі.