Праблемныя актывы дзяржбанкаў растуць, як снежны ком

Праблемныя актывы дзяржаўных банкаў Беларусі ў замежнай валюце з 1 красавіка па 1 ліпеня павялічыліся на 33,1% - з 1,77 трлн рублёў да 2,35 трлн рублёў у эквіваленце.

Пра гэта Нацбанк паведамляе ў сваім дакладзе «Банкаўскі сектар Рэспублікі Беларусь. Кароткая характарыстыка ўстойлівасці функцыянавання на 1 ліпеня 2012 года».

У той жа час банкі з замежным капіталам нязначна павялічылі такія актывы за аналагічны перыяд (усяго на 1,8%) - з 1,95 трлн да 1,98 трлн рублёў.

Тым самым доля ў актывах, схільных да крэдытнай рызыкі, у замежнай валюце ў дзяржбанкаў павялічылася з 4,46 да 5,11%, а ў замежных - знізілася з 4,93 да 4,49%.

Пастаяннае павелічэнне праблемных актываў у валюце на балансе дзяржаўных банкаў можа сведчыць аб нарастаючай пагрозе ўзнікнення крызісу неплацежаздольнасці контрагентаў дзяржбанкаў.