Барысаўскі чыноўнік: Людзі самі вінаватыя, што засталіся без вады

Камунальнае НЗ у Барысаве стала адным з самых буйных за апошні час.

Суткі 150–тысячны горад жыў без вады. Замест таго каб папрасіць прабачэння перад грамадзянамі за дастаўленыя нязручнасці, чыноўнікі па старой традыцыі абвінавацілі людзей у тым, што гэта яны паспрыялі аварыі.

- У каналізацыйную сетку патрапілі досыць вялікія кавалкі металу і драўніны даўжынёй да паўметра, рыззё і іншыя іншародныя прадметы. Жыхары дамоў нярэдка засмечваюць каналізацыю, грашаць гэтым і работнікі прадпрыемстваў, - распавёў у інтэрв'ю газеце «Адзiнства» першы намеснік старшыні райвыканкама Ігар Брыла. - Метал і драўніна ў каналізацыйную сетку магла трапіць праз адкрытыя каналізацыйныя люкі, якіх толькі ў бягучым годзе было выкрадзена каля 30. Нягледзячы на тое, што наўзамен іх устанаўліваюцца новыя люкі, праблема ў апошні час абвастрылася. Некалькі металічных і драўняных рэшткаў у каналізацыйным калектары занялі такое палажэнне, што вакол іх вельмі хутка ўтварыўся затор з ануч, старызны і іншых іншародных матэрыялаў, што і прывяло да аварыйнай сітуацыі.

Брыль папрасіў людзей асцярожней ставіцца да каналізацыйных сцёкаў і заявіў, што ўлады ў дзень НЗ прынялі ўсе неабходныя меры, каб грамадзяне не адчувалі нязручнасцяў. У прыватнасці, падвозілі ваду да дамоў, школ і дзіцячых садкоў. Але хто будзе за яе плаціць? Як паведаміў наш чытач Уладзімір, у горадзе ўчора прайшла нарада, на якой прынялі рашэнне, што ўстановам адукацыі прыдзецца пакрыць выдаткі.

- Гэта не так, - абверглі чуткі ў гарвыканкаме. - Як вы прапануеце браць грошы за ваду, якую прывозілі ў бочках? Сёння мы гаворым толькі аб аплаце гандлёвым прадпрыемствам, у якіх закуплялі ваду бутыляваную. Гэта будзе праводзіцца з рахункаў аддзелаў адукацыі.