У Кобрыне на пешаходным пераходзе «хуткая» збіла дзяцей
45- 15.10.2013, 16:19
- 31,125
У горадзе Кобрын на нерэгуляваным пешаходным пераходзе кіроўца хуткай медыцынскай дапамогі збіў двух дзяцей.
Пра гэта паведаміла карэспандэнту БелТА начальнік аддзялення па агітацыі і прапагандзе ДАІ УУС Брэсцкага аблвыканкама Наталля Сахарчук.
ДТЗ адбылося 14 кастрычніка каля 16.20 на вуліцы Дружба. Двое хлопчыкаў (2006 і 2007 гадоў нараджэння) пераходзілі праезную частку па нерэгуляваным пешаходным пераходзе справа налева па ходзе руху аўтамабіля. Пры гэтым маршрутнае таксі спынілася, а 48-гадовы кіроўца хуткай, які ехаў на службовым аўтамабілі без пробліскавых маячкоў, здзейсніў наезд на дзяцей.
Хлопчыкі з цяжкімі цялеснымі пашкоджаннямі змешчаныя ў траўматалагічнае аддзяленне Кобрынскай раённай бальніцы. У абодвух пацярпелых дыягнаставаны закрытыя чэрапна-мазгавыя траўмы і страсенне галаўнога мозгу. Акрамя таго, у шасцігадовага дзіцяці выяўленая гематома левага вока і закрыты пералом верхняй траціны левага сцягна. У сямігадовага хлопчыка - пералом правай ключыцы і пашкоджанне звязак шыйнага аддзела хрыбетніка.
А потым менш чым праз паўгадзіны ў Кобрыне адбылася яшчэ адна аварыя, у якой пацярпела 12-гадовая дзяўчынка. І ў гэтым выпадку наезд на дзіцяці быў здзейснены на нерэгуляваным пешаходным пераходзе. З цяжкімі цялеснымі пашкоджаннямі (страсенне галаўнога мозгу, пераломы сядалішчнай і плечавой костак) школьніца 2001 года нараджэння дастаўленая ў раённую бальніцу.
З пачатку года на тэрыторыі Брэсцкай вобласці адбылося 52 ДТЗ з удзелам дзяцей, у якіх 2 дзіцяці загінулі, а 54 атрымалі траўмы рознай ступені цяжкасці.