Маскоўская паліцыя затрымала дырэктара гародніннай базы ў Бірулёва

Паліцыя затрымала старшыню савета дырэктараў кампаніі, якая кіруе гародніннай базай у маскоўскім раёне Бірулёва Заходняе.

Пра гэта гаворыцца ў паведамленні на сайце Следчага камітэта Расеі.

Генеральны дырэктар фірмы Аліасхаб Гаджыеў абвешчаны ў федэральны вышук. Супраць затрыманага Магамеда Чурылава распачалі справу аб арганізацыі незаконнай міграцыі (артыкул 322.1 КК РФ). «Цяпер пакуль гаворка ідзе пра двух грамадзян Узбекістана і аднаго грамадзяніна Малдовы, якім падазраваныя выплачвалі заработную плату і падавалі месца для пражывання», - распавёў афіцыйны прадстаўнік СКР Уладзімір Маркін. Незаконнае працаўладкаванне мела месца ў перыяд з 1 па 15 кастрычніка 2013 года, піша Lenta.ru.

Затрыманы таксама генеральны дырэктар агенцтва «Канкорд», якое забяспечвала ахову базы, Віктар Кацялеўскі, з ім праводзяцца следчыя дзеянні. Разам з тым Маркін адзначыў, што кіраўніцтва базы «практычна самаўхілілася і ніякага садзейнічання следству не аказвае».

Раней мэр Масквы Сяргей Сабянін заяўляў, што ў кіраўніцтве бірулёўскай гародніннай базы значацца падстаўныя асобы. Усяго, як высветлілі журналісты, уладальнікамі ЗАТ «Новыя Чаромушкі» значацца 160 фізічных асоб, а галоўнымі бенефіцыярамі прадпрыемства называюць братоў Ігара Ісаева і Ібрагіма Гаджыева. Ісаеў у цяперашні час знаходзіцца ў бегах, а Гаджыева 15 кастрычніка бачылі ў гарадскім дэпартаменце гандлю і паслуг. Ганаровым прэзідэнтам «Новых Чаромушак» з'яўляецца герой Расеі, лётчык-выпрабавальнік Магамед Талбоеў.

Дзейнасць фірмы-аператара гародніннай базы «Пакроўская» была прыпыненая на 90 дзён рашэннем Чартанаўскага суда Масквы па пазове Расспажыўнагляду. Галоўны санітарны ўрач Генадзь Анішчанка заявіў, што на базе маюцца «праблемы з заселеннасцю грызунамі».

Праверкі дзейнасці гародніннай базы ў Бірулёва пасля масавых беспарадкаў і пагромаў, якія прайшлі там 13 кастрычніка. Акцыі пратэсту былі выкліканыя забойствам Ягора Шчарбакова, па падазрэнні ў якім затрымалі ўраджэнца Азербайджана Архана Зейналава.