Менская школьніца дапамагла затрымаць рабаўніка

14-гадовая дзяўчына спачатку паспрабавала самастойна затрымаць злачынцу.

Рабаўнік прыстрашыў расправай. Тым не менш, школьніца прасачыла за зламыснікам да самага ягонага дома і паведаміла ў міліцыю. Аб незвычайным выпадку паведамляе прэс-служба ГУУС.

У нядзелю Валерыя гуляла разам з сяброўкай на вуліцы Ванеева. Нечакана дзяўчыны ўбачылі, як нейкі малады мужчына стаў вырываць торбу ў жанчыны, што ішла. Яна ўжо ўпала на зямлю, але рабаўнік, цягнучы жанчыну па асфальце, далей вырываў сумку, пакуль пацярпелая нарэшце не разамкнула рукі. Стаўшы сведкам злачынства, Валерыя кінулася за злодзеем. Здагнаўшы рабаўніка, дзяўчына схапіла яго за руку і запатрабавала вярнуць сумку. Той спачатку нават здзівіўся, а потым пачаў лаяцца і прыстрашыў расправай. Зрабіўшы выгляд, што спалохалася, школьніца адышла, а злачынец кінуўся ў бліжэйшы двор.

Валерыя, імкнучыся захоўваць канспірацыю, прайшла за ім. Яшчэ праз некалькі двароў дзяўчына ўбачыла, як мужчына ўвайшоў у пад'езд дома. Пасля гэтага яна патэлефанавала на нумар «102».

Міліцыянтам школьніца паказала пад'езд, у якім схаваўся зламыснік, і апісала яго. З апісання адзін з супрацоўнікаў выказаў здагадку, што рабаўніком можа быць паднаглядны, які як раз пражывае ў гэтым доме. Так і адбылося. 32-гадовы раней судзімы беспрацоўны практычна адразу ж прызнаўся ў зробленым. У дачыненні да яго распачатая крымінальная справа.

Сёння раніцай кіраўнікі Партызанскага РУУС сталіцы наведалі школу, у якой вучыцца Валерыя, і ў прысутнасці выкладчыкаў і аднакласнікаў падзякавалі дзяўчынцы за смелы ўчынак. Ад імя начальніка Партызанскага РУУС дзяўчыне ўручылі ліст падзякі, кветкі і грашовую прэмію.

«Для нас заўсёды вельмі важна, калі гараджане дапамагаюць у пошуку або затрыманні злачынцаў, - адзначыў намеснік начальніка Партызанскага РУУС Аляксандр Рыдзецкі. - Вядома, гэта не першы выпадак, калі менчукі з актыўнай жыццёвай пазіцыяй спрыяюць у супрацьстаянні беззаконня. Але павінен прызнацца, што Валерыя - самы малады герой з гэтых станоўчых прыкладаў»..