Дзе танней прадукты: у Менску, Вільні ці Беластоку?

Дзіўная справа, але беларусы едуць у Літву і Польшчу не толькі за «барахлом», але і за прадуктамі.

У буйных сеткавых гіпермаркетах суседніх краін натоўпы нашых суайчыннікаў скупляюць віскі, цукеркі, багеты і каўбасу. Каля даведачных цэнтраў, дзе афармляюць вяртанне ПДВ, выстройваюцца чэргі людзей з сінімі пашпартамі. Ці сапраўды кошты ў бліжэйшых да нас дзяржавах ніжэй? Каб у гэтым пераканацца (а можа, і зняверыцца - паглядзім), журналісты onliner.by прагуляліся па самых раскручаных гіпермаркетах трох гарадоў - Вільні, Беластока і Менска.

«Вячэра халасцяка»: купляем прадукты на 150 тыс.

У Вільні мы зазірнулі ў Maxima (той, які размешчаы ў Мецы шапагалізма - «Акропалісе»), у Беластоку наведалі Auchan, а ў Менску рызыкнулі зазірнуць у «Карону». Для пачатку праверым, што можна купіць у трох крамах на пэўную суму рублёў - напрыклад, 150 тыс. беларускіх.

Лічбу мы ўзялі не са столі, а ў цэлага навуковага інстытута - НДЭІ Мінэканомікі. Там правялі даследаванні і палічылі, што ў II квартале 2013 года сярэдні чэк у большасці гандлёвых арганізацый Беларусі не перавышаў 150 тыс. рублёў. Такія дадзеныя былі атрыманыя ў ходзе кан'юнктурнага апытання кіраўнікоў арганізацый рознічнага гандлю. У 18% апытаных сума сярэдняга чэка знаходзілася ў дыяпазоне 150-249 тыс. рублёў, у 9% - 500 тыс. рублёў і больш. Апошняя лічба, асабліва калі вы жывяце ў Менску, больш падобная на праўду, але мы ўсё ж будзем прытрымлівацца сярэдзіны.

Maxima

Такім чынам, у нашым распараджэнні $16 (150 тыс. беларускіх рублёў у эквіваленце), або 40 літаў. Шукаем прадукты не самыя дарагія, але і «Ролтан» браць не будзем. Што зможам купіць на гэтую суму?

Пачынаем з піва - няхай гэта будзе стандартны светлы лагер, літр Švyturio Gintarinis у «пластыцы». Яго кошт - $1,62. Паслядоўна ў нашым кошыку аказваюцца нарэзаны чорны хлеб (амаль паўкіло), маленькая палка каўбасы (230 грам), бюджэтныя пельмені, 4 памідоры, шпроты ў алеі, пачак маянэзу, сыр (246 грам), 5 сасісак, семечкі, пачак Lays (150 грам). За тыя «капейкі», што засталіся, бярэм маленькі «Снікерс». Набор халасцяка гатовы! Выніковая сума - 40,17 літа.

Auchan

Аналагічныя прадукты паспрабуем купіць і ў Беластоку. У нашым распараджэнні ўсё тыя ж $16, або 49 злотых. Хопіць ці не?

З півам адразу ж праблемы - «пластык» тут адсутнічае. Не застаецца нічога іншага, акрамя як узяць дзве бутэлькі Żywiec па 0,5 (кожная па 2,61 злотых, або $0,85, плюс кошт тары). Не знаходзім таксама маянэзу ў мяккай упакоўцы - бярэм у «шкле». Шпроты ў алеі ёсць, купляем у таматным соўсе. Выбар семак невялікі, але адзін пачак знаходзім. У выніку грошай хапае з лішкам, застаецца нават невялікая рэшта - на карамелькі.

«Карона»

Са 150 тыс. рублёў у кашальку ідзем у новую «Карону» ва Уруччы.

У якасці піва бярэм літр «Аліварыя Залатая», акрамя таго, пінскую каўбасу, пельмені з Ваўкавыска, дарагія айчынныя памідоры і іншыя аналагі набытых за мяжой прадуктаў. Грошай, на жаль, бракуе. Наш халасцяк застаецца без маянэзу, «Снікерса» і семак. Усё ж дакупляем гэтыя прадукты, перавышаючы ліміт на тры з невялікім даляра.

Дарэчы, пасля замежных прадуктовых гіпермаркетаў адразу кідаецца ў вочы: беларуская крама літаральна наводненая людзьмі з рацыямі і навушнікамі. Здаецца, ахоўнікаў нават больш, чым пакупнікоў. Нягледзячы на такі пільны кантроль, сістэма ўсё роўна дае збоі. На касе нам забыліся прабіць піва, а «рамка» не спрацавала. Выявіўшы гэта, мы вярнуліся і піва «дабілі».

Што ў выніку? Прадукты ў Беларусі хоць ледзь-ледзь, але ўсё-такі даражэй. І гэта калі казаць пра зусім бюджэтныя варыянты.

Віскі і агуркі: Менск пакуль адстае

Параўнаем і іншыя кошты з папраўкай на восень - сканцэнтраваўшыся на гародніне. Найбольш выгадныя прапановы ў табліцы вызначаныя тоўстым шрыфтам.

Рабіць далёка ідучыя высновы на аснове гэтай інфармацыі не варта (пытанне параўнання якасці тавараў у трох краінах мы не разглядалі, ды і сярэдняя зарплата ў Беларусі ніжэй чым у Польшчы і Літве, што немалаважна), аднак сякія-такія назіранні відавочныя. Прадукты першай неабходнасці ў Беларусі сапраўды пакуль танней (толькі памідоры і агуркі бязбожна дарагія), але ганарыцца асабліва няма чым. Як толькі мы выходзім з бюджэтнай групы на ўзровень вышэй, адразу бачым несупадзенні па кошту свініны, сыру, ялавічыны (хоць у «Кароне» яе не было ўвогуле, але сярэдні кошт па Менску ці ледзь не ў 1,5-2 разы вышэй), а таксама віскі, шакаладу і гэтак далей. Тыя, хто ездзяць за гэтым у Беласток, дзе, да ўсяго іншага, можна вярнуць прыстойную суму за кошт Tax Free, усё ж маюць рацыю.