BlackBerry хочуць купіць кітайцы

Сусветны лідар па вытворчасці персанальных кампутараў, кітайская Lenovo, сур'езна разглядае магчымасць куплі канадскага вытворцы смартфонаў BlackBerry.

Праўда, здзелка можа сарвацца з-за перашкод палітычнай уласцівасці, перадаюць «Вести».

Па дадзеных амерыканскага дзелавога выдання The Wall Street Journal, прадстаўнікі Lenovo падпісалі пагадненне аб невыдаванні, каб мець магчымасць азнаёміцца са станам спраў некалі вядучага сусветнага вытворцы смартфонаў. Нават калі бакі дамовяцца аб здзелцы, яе яшчэ трэба будзе ўхваліць канадскаму ўраду.

Атрыманне такога адабрэння пад вялікім пытаннем - цяперашні ўрад Канады сфармавалі кансерватары, якія негатыўна адносяцца да замежных інвестыцый у стратэгічна важныя прадпрыемствы. Смартфоны BlackBerry выкарыстоўваюць сотні тысяч дзяржслужачых у Канадзе і ЗША, уключаючы кіраўніка Белага Дома Барака Абаму.

Хутчэй за ўсё, аддаць такі актыў кітайцам у Атаве не захочуць. Магчыма, Lenovo прыйдзецца дамаўляцца аб куплі асобных падраздзяленняў BlackBerry - у гэтым выпадку канадскія чыноўнікі могуць быць больш падатлівыя.

Справы ў BlackBerry ідуць так сабе ўжо не першы год, канкураваць з iPhone і Android становіцца ўсё складаней. Як паведамлялася нядаўна, мэнэджмэнт разглядае магчымасць продажу кампаніі Google, Intel, SAP ці аднаму з буйных азіяцкіх вытворцаў смартфонаў.

Патэнцыйныя пакупнікі BlackBerry зацікаўленыя ў першую чаргу ў яе актывах. Кампанія валодае сэрвісам і тэхналогіяй BBM для абмену імгненнымі паведамленнямі, які ацэньваюць у 3-4,5 мільярда даляраў, а таксама патэнтным партфелем агульным коштам 2-3 мільярды. Тым не менш, магчымыя партнёры BlackBerry ставяцца да здзелкі з асцярогай, паколькі актывы кампаніі могуць моцна патаннець: у мінулым месяцы вытворца даў справаздачу пра амаль мільярдныя страты і спісанні непрададзеных смартфонаў Z10.