Замест уключэння ацяплення менчукоў пакінулі без гарачай вады
38- 2.10.2013, 15:32
- 17,724
Жыхарам дома на вуліцах Чырвонай і Якуба Коласа адключылі гарачую ваду.
Пра гэта яны паведамілі газеце «Наша Нiва». Аб'яву аб тым, што ў доме не будзе гарачай вады яны ўбачылі на дзвярах пад'ездаў.
«Замест таго, каб уключыць ацяпленне, нам адключылі гарачую ваду. Замест халоднай ідзе нейкая незразумелая іржа, - скардзіцца чытачка, якая жыве на вуліцы Чырвонай. - Мы звярнуліся ў ЖЭС, аднак там нас накіравалі ў цепласеткі, сказаўшы, што цяпер у нашым раёне «ўразаюць новы канал». Чаму яны робяць гэта ў кастрычніку, тым больш, што сёння ўначы тэмпература апусціцца ніжэй за нуль?»
У цепласетках журналістаў перанакіравалі ў ЖЭС. Там паведамілі, што гарачай вады не будзе і ў шэрагу дамоў на вуліцы Якуба Коласа. Начальнік раёна па цепласетках Аляксандр Слонімскі паведаміў, што адключэнне - планавае.
«Мы запускаем новую магістраль, таму вымушаныя адключыць гарачую ваду. Так, гэта планавае адключэнне», - сказаў ён.
Нягледзячы на тое, што адключэнне вады летам у раёне таксама праводзілася, працы над магістраллю не скончыліся.
«Мы летам працавалі на тэрыторыі завода Арджанікідзэ, сёння ўвечары ваду дамо», - запэўніў Слонімскі.
Жыхары дамоў, якія засталіся без вады, плануюць звяртацца са скаргай у адміністрацыю Лукашэнкі.