S&P панізіла прагноз рэйтынгаў Менска

Міжнароднае рэйтынгавае агенцтва Standard & Poor's перагледзела прагноз па рэйтынгах Менска з «пазітыўнага» на «стабільны».

Адначасова пацверджаны доўгатэрміновы крэдытны рэйтынг эмітэнта «В-».

Пра гэта гаворыцца ў прэс-рэлізе агенцтва.

Прагноз па рэйтынгах Менска перагледжаны з «пазітыўнага» на «стабільны» пасля аналагічнага рэйтынгавага дзеяння ў дачыненні да Беларусі і пацверджання суверэнных рэйтынгаў (прагноз па рэйтынгах Беларусі перагледжаны агенцтвам на «стабільны» ў сувязі з пагаршэннем паказчыкаў знешняй ліквіднасці; рэйтынгі пацверджаныя на ўзроўні «В-/В»).

«Рэйтынг Менска адлюстроўвае наша меркаванне аб валатыльнай і недафінансаванай сістэме міжбюджэтных адносінаў, што абумоўлівае абмежаваную прадказальнасць і гнуткасць бюджэту горада, а таксама аб невысокім узроўні дабрабыту, негатыўнай якасці кіравання і высокім узроўні умоўных абавязацельстваў. Фактарамі, якія пазітыўна ўплываюць на ўзровень рэйтынгу, з'яўляюцца высокія паказчыкі выканання бюджэту, нейтральныя паказчыкі ліквіднасці і нізкая пазыковая нагрузка», - растлумачылі ў S&P.

Рэйтынг Менска «В-» стрымліваецца ўзроўнем суверэннага крэдытнага рэйтынгу па абавязацельствах у замежнай валюце - у адпаведнасці з ацэнкай S&P сістэмы міжбюджэтных адносінаў Беларусі, у рамках якой рэйтынгі беларускіх субнацыянальных органаў улады, на думку экспертаў агенцтва, не могуць быць вышэй суверэннага рэйтынгу. Аднак у адпаведнасці з метадалогіяй агенцтва эксперты S&P вызначаюць індыкатыўны ўзровень крэдытаздольнасці Менска на ўзроўні «b+». «Крэдытная якасць Менска застаецца высокай, таму мы пацвярджаем нашу ацэнку характарыстык уласнай крэдытаздольнасці горада на ўзроўні «b+», - растлумачылі ў агенцтве.

«Улічваючы той факт, што Менск застаецца цэнтрам эканамічнага росту краіны (на яго долю прыпадае каля 30% ВУП Беларусі), а таксама адносна высокі ўзровень інфляцыі, мы мяркуем, што ў рамках базавага рэйтынгавага сцэнара рост даходаў горада ў сярэднетэрміновай перспектыве па-ранейшаму будзе перавышаць рост бягучых расходаў, што прывядзе да высокага значэння бягучага прафіцыту бюджэту - у сярэднім больш за 25% у 2013-2016 гадах (у 2011-2012 гг. бягучы прафіцыт заставаўся надзвычай высокім і складаў больш за 40%)», - адзначылі ў S&P.

Менск фінансуе свае значныя капітальныя выдаткі як наўпрост з бюджэту, так і з дапамогай муніцыпальных кампаній. Горад таксама гуляе значную ролю ў мясцовай эканоміцы, што падвяргае яго рызыкам, звязаным з высокім узроўнем умоўных абавязацельстваў. Акрамя таго, горад ажыццяўляе маштабныя праекты па жыллёваму будаўніцтву і развіццю інфраструктуры, звязаныя з падрыхтоўкай да правядзення чэмпіянату свету па хакеі ў 2014 годзе. Гэта аказвае ціск на капітальныя выдаткі гарадскога бюджэту. Разам з тым у сувязі з заканадаўчым абмежаваннем на дэфіцыт беларускіх субнацыянальных органаў улады (у прыватнасці, у 2012-2013 гадах выкананне бюджэтаў з дэфіцытам забаранялася) паказчыкі дэфіцыту гарадскога бюджэту з улікам капітальных выдаткаў у 2014-2015 гадах у сярэднім будуць заставацца невысокімі - каля 2-3% даходаў бюджэту, мяркуюць эксперты S&P.

«Дзякуючы высокім бягучым паказчыкам і заканадаўчым абмежаванням на аб'ём прамых запазычанняў поўная пазыка Менска, хутчэй за ўсё, не перавысіць 30% бягучых даходаў у сярэднетэрміновай перспектыве. Згодна з нашым базавым сцэнарам асноўную частку пазыкі (больш за 70%) будуць складаць гарантыі, выдадзеныя па запазычанняў муніцыпальных кампаній. Поўная пазыка горада ў канцы 2013 года складала ўсяго 20% адкарэктаваных бягучых даходаў, што з'яўляецца нізкім паказчыкам», - звярнулі ўвагу ў агенцтве.

«Паколькі індыкатыўны ўзровень крэдытаздольнасці Менска вызначаны на ўзроўні «b+», а крэдытны рэйтынг «В-» абмежаваны ўзроўнем суверэннага крэдытнага рэйтынгу, у цяперашні час мы не бачым рэалістычнага сцэнара, пры якім індыкатыўны ўзровень крэдытаздольнасці горада Менска панізіцца на тры прыступкі і стане ніжэй за ўзровень суверэннага рэйтынгу. Такім чынам, рэйтынг Менска можа быць паніжаны ў выніку паніжэння суверэннага рэйтынгу, а не ў выніку зніжэння індыкатыўнага ўзроўню крэдытаздольнасці», - адзначылі ў S&P.

У той жа час рэйтынг Менска можа быць павышаны ў бліжэйшыя 12 месяцаў у выпадку павышэння суверэнных рэйтынгаў Беларусі, падкрэслілі ў рэйтынгавым агенцтве.