Канфіскаваныя аўто будуць прадаваць на аўкцыёнах
27- 30.10.2013, 13:24
- 31,523
Былы ўладальнік, які трапіўся п'яным за рулём, зможа выкупіць сваё аўто.
З 24 кастрычніка ў кіроўцаў, якія трапіліся п'янымі другі раз на працягу года, забіраюць аўто. Назусім. Не паспеў дакумент запрацаваць, як каля дзесяці беларусаў ужо сталі кандыдатамі на канфіскацыю. Самым буяным парушальнікам з усіх, хто трапіў у чорны спіс, можа лічыцца 28-гадовы кіроўца БМВ. Каб спыніць маладога чалавека, сталічным супрацоўнікам ДАІ прыйшлося кінуцца ў сапраўдную пагоню, яны два разы стрэлілі ў паветра, але п'янага ліхача гэта не спыніла. Пераслед скончыўся тады, калі ў машыне лопнула кола, а нецвярозы кіроўца паспрабаваў уцячы, але беспаспяхова, піша «Комсомольская правда в Беларуси».
- Гэты парушальнік з 2007 года ўжо ў пяты раз затрымліваўся за кіраванне ў нецвярозым стане. Двойчы яго судзілі за п'яную язду, у апошні раз гэта адбылося ў 2011 годзе. І так як судзімасць не пагашаная, а ён зноў сеў за руль нецвярозым, яго машына падлягае канфіскацыі, - пракаментавала Анастасія Радзько, старэйшы інспектар па агітацыі і прапагандзе аддзела ДАІ УУС Цэнтральнага раёна Менска. - На гэты раз у кіроўцы выяўлена 1,44 праміле алкаголю (практычна бутэлька гарэлкі. - Рэд.). Ён распавёў, што ўвечары піў піва, пасля чаго сеў за руль. Убачыўшы супрацоўнікаў ДАІ, спалохаўся і спадзяваўся, што здолее схавацца.
Зараз БМВ п'янага ліхача, як і іншых такіх жа парушальнікаў, знаходзіцца на штрафстаянцы ў чаканні суда. І хоць аўто, хутчэй за ўсё, будзе канфіскавана, кіроўцу прыйдзецца аплачваць штрафстаянку. Гэта значыць, і машыну забяруць, і прыйдзецца яшчэ выкласці некалькі мільёнаў. Па нашых падліках, мінімум машына на стаянцы будзе 115 дзён. І раз суткі каштуюць 50 тысяч, то сума набягае ў 5 мільёнаў 750 тысяч.
Ці можна будзе выкупіць машыны танна?
- Пасля ўступлення ў законную сілу рашэння суда матэрыялы ў дачыненні да канфіскаванага транспартнага сродку прадстаўляюцца на ўлік у камісію па рабоце з маёмасцю, накiраванай у даход дзяржавы пры мясцовых выканкамах. Камісія прымае рашэнне аб яго ацэнцы і далейшай перадачы для рэалізацыі ў РУП «Гандлёвы дом «Усходні». Як правіла, з моманту ўступлення ў законную сілу судовага рашэння і паступленнем у продаж праходзіць каля месяца. Што ж тычыцца коштаў на канфіскаваныя аўтамабілі, то яны практычна такія ж, як рынку. А ўсе атрыманыя грошы ідуць у бюджэт, - тлумачыць Таццяна Папова, намеснік начальніка ўпраўлення ўліку маёмасці і грашовых сродкаў Дэпартамента па гуманітарнай дзейнасці Упраўлення справамі Лукашэнкі.
- Ці можа былы ўладальнік выкупіць свой аўтамабіль, як толькі ён апынецца на «Усходнім»?
- З 1 лістапада ўсе канфіскаваныя транспартныя сродкі будуць рэалізоўвацца на РУП «Гандлёвы дом «Усходні» з дапамогай правядзення аўкцыёну. Выходзіць, у былых уладальнікаў з'явіцца права ўдзельнічаць у таргах. Падчас аўкцыёну на машыну будзе заяўлены першапачатковы кошт, а гаспадаром стане той, хто больш заплаціць. Бо часам бывае так, што на адзін аўтамабіль прэтэндуюць некалькі патэнцыйных пакупнікоў. Зараз на продаж у Гандлёвым доме «Усходні» выстаўлена каля 100 канфіскаваныя аўто. Сярод іх некалькі фур, аўтобусаў і машын прадстаўніцкага класа на літоўскіх нумарах. Напрыклад, Volvo S80, са скураным салонам, 2007 года прапаноўваюць купіць за 22 тысячы 800 даляраў. На рынку яе кошт - 22 500 даляраў. А вось канфіскаванае Audi A6 1999 года выпуску ва «Усходнім» можна купіць за 9 тысяч 260 даляраў, на рынку яна каштуе крыху даражэй - 9400 - 9800. - Бывае, не паспееш выставіць аўтамабіль на продаж, як яго купляюць на працягу гадзіны. Некаторыя прадаюцца некалькі месяцаў. Да нас жа прыходзіць тавар у розным стане: аўтамабілі ў добрым стане, дрэнным, разбітыя, распілаваныя, - распавялі ў Гандлёвым доме «Усходні». Яго супрацоўнікі запэўнілі, што гатовыя прыняць усе канфіскаваныя аўтамабілі.