З 1 лістапада тэхагляд трэба праходзіць па-новаму

1 лістапада ўносяцца некаторыя змены ў парадак правядзення тэхагляду транспартных сродкаў.

Пра гэта паведаміла прэс-служба Міністэрства транспарту і камунікацый Беларусі.

«Пастановай Міністэрства транспарту і камунікацый Рэспублікі Беларусь ад 15.08.2013 №30 зацверджаная Змена №1 да тэхнічнага кодэкса ўстаноўленай практыкі ТКП 309-2011 (02190) «Дзяржаўны тэхнічны агляд транспартных сродкаў. Парадак правядзення праверкі тэхнічнага стану транспартных сродкаў». Змены ўводзяцца ў дзеянне з 1 лістапада 2013 года.

У прыватнасці, змены датычацца патрабаванняў, што прад'яўляюцца да экалагічных параметраў рухавікоў транспартных сродкаў. Гэта звязана з увядзеннем у дзеянне двух Дзяржаўных стандартаў Рэспублікі Беларусь: СТБ 2169-2011 «Транспартныя сродкі, абсталяваныя рухавікамі з узгараннем ад сціску. Дымнасць адпрацаваўшых газаў. Нормы і метады вымярэння» і СТБ 2170-2011 «Транспартныя сродкі, абсталяваныя рухавікамі з прымусовым запальваннем. Выкіды забруджвальных рэчываў у адпрацаваных газах. Нормы і метады вымярэння», - гаворыцца ў паведамленні Мінтранспарта.

У дзеючай рэдакцыі тэхнічнага кодэкса выкарыстоўваюцца значэнні гранічна дапушчальных экалагічных параметраў рухавікоў транспартных сродкаў, устаноўленыя ў свой час Дзяржаўнымі стандартамі СССР.

«Пераход на новыя патрабаванні дазволіць праводзіць ацэнку шкоднага ўздзеяння транспартных сродкаў на навакольнае асяроддзе ў залежнасці ад прысвоенага ім экалагічнага класу, які паказваецца ў рэгістрацыйных дакументах. У выпадку адсутнасці ў рэгістрацыйных дакументах такой інфармацыі, ацэнка кантраляваных экалагічных параметраў будзе ажыццяўляцца згодна з гранічна дапушчальнымі значэннямі, паказанымі ў дачыненні да аўтамабіляў, якія маюць першы экалагічны клас.

Другое новаўвядзенне ўстанаўлівае дадатковыя патрабаванні, што прад'яўляюцца да аўтамабіляў-таксі ў ходзе правядзення іх дзяржаўнага тэхнічнага агляду. Так, павышаная ўвага будзе надавацца знешняму выгляду аўтамабіляў, стану салона і камплектацыі аўтамабіляў-таксі. Пад кантроль патрапяць: апазнавальны ліхтар, палосы жоўтага колеру на бакавых паверхнях кузава, адметны знак абслугоўвання, рэгістрацыйныя знакі, пасажырскія дзверы, супрацьадкатны ўпор, таксометр, механізмы рэгулявання сядзенняў і спінак сядзенняў пасажыраў, стан салона і абсталявання, якое знаходзіцца ў салоне транспартнага сродку», - адзначаецца ў паведамленні ведамства.

Яшчэ адно змяненне ў ТКП звязана з устанаўленнем вобласці ўжывання параметраў кантролю ў дачыненні да мапедаў і прыраўнаваных да іх транспартных сродкаў, а таксама квадрацыклаў, для якіх нацыянальным заканадаўствам прадугледжаная дзяржаўная рэгістрацыя ў рэгістрацыйных падраздзяленнях ДАІ Міністэрства ўнутраных спраў Рэспублікі Беларусь.