Старшыня калгасу: Навошта нам навязваюць недаробленую беларускую тэхніку?

Калгас купіў трактар «Беларус», а той ламаецца кожны месяц.

«Вечерний Брест» апісвае пакуты работнікаў СВК «Рагазнянскае», якія сутыкнуліся з «сырым», недаробленым трактарам вытворчасці «Белшыны». За кароткі тэрмін у трактара паспелі зламацца рухавік, акумулятарная батарэя, кампрэсар, турбакандыцыянер, трэснула шына... Але кампенсаваць выдаткі на рамонт дылер і вытворца не спяшаюцца.

Пачалося ўсё паўтара гады таму. 19 сакавіка 2012 года сур'ёзную машыну - трактар «Беларус» 3022 ДЦ магутнасцю 300 конскіх сіл - прыгналі ў пасёлак Ленінскі Жабінкаўскага раёна. На жаль, менш чым праз два месяцы працы «Беларус» стаў «задыхацца». Яму відавочна бракавала магутнасці рухавіка, значна вырас выдатак масла. Звярнуліся да дылера - ААТ «Кобрынаграмаш». Сталі разбірацца.

Аказалася, што ў трактары наогул няма датчыка засмечанасці паветранага фільтра. Увогуле, з-за адсутнасці патрэбнай дэталі ў рухавік засмактала і пыл, і бруд (зразумелая справа, праца ў полі!), з-за чаго ён прыйшоў у непрыдатнасць.

Вінаватымі прызналі, як ні дзіўна... рагазнянцаў-«ленінцаў». Хоць пры дасканалым аглядзе, сцвярджаюць механізатары і спецыялісты, няўзброеным вокам было відаць, што ніякіх прыкмет падключэння датчыка не выяўлена.

У разгар вясновых работ «Рагазнянскі» апынуўся без трактара - як без рук. З дылерам - ААТ «Кобрынаграмаш» - на жаль, агульнага разумення ў гаспадарцы не знайшлі. Прыйшлося ствараць камісію. У адзін цудоўны дзень у СВК наляцелі адначасова 14 чалавек! Прадстаўнікі ААТ «Кобрынаграмаш», сэрвіснага цэнтра ААТ «Івацэвічыагратэхсэрвіс» (яны рыхтавалі трактар да продажу), РУП «МТЗ», «Брэстаблаграсэрвісу», абласнога дзяржтэхнагляду, інспекцыі дзяржтэхнагляду Жабінкаўскага раёна... Ніхто не спяшаўся браць на сябе гарантыйны рамонт.

Праўда, пасля неаднаразовых зваротаў у гаспадарку даслалі так званы падменны трактар. А затым на Менскім трактарным заводзе зрабілі капітальны рамонт рухавіка, які зламаўся, ліквідавалі непаладкі. Работы выканалі бясплатна, а вось за запчасткі гаспадарцы прыйшлося выкласці 40 млн рублёў дадаткова да першапачатковага кошту.

Увогуле, худа-бедна першы раз выйшлі з сітуацыі. «Беларус» 3022 ДЦ - трактар магутны, яго задзейнічаюць падчас важных сельскагаспадарчых кампаній. Пакуль ён стаяў без справы, зразумела, усё было ў парадку. Але толькі да чарговых вясновых работ ужо цяперашняга, 2013 года. 4 красавіка выходзіць са строю акумулятарная батарэя. Зноў тыя ж «разборкі». Вядома, па гарантыі і яе замянілі. Але праз... 116 дзён!

Будзеце смяяцца, але 25 красавіка стала непрыдатнай для працы адна шына задняга кола... Вядома, знайшлі запаску з незапатрабаванай пары колаў, але з «абуткам» аказалася яшчэ больш складана, чым з акумулятарам. «Беларускі John Deere», як называюць жартам гэтую мадэль, доўгі час стаяў «разутым». «Кобрынаграмаш», куды звярнуўся «Рагазнянскі», пераадрасаваў скаргу непасрэдна вытворцу - прадпрыемству «Белшына». Праўда, калгаснікам ад гэтага не лягчэй. Нядаўна і на другой шыне з'явіліся расколіны. Такое ўражанне, што гума не вытрымлівае нагрузкі. Кажуць, у іншых гаспадарках беларускія шыны сталі мяняць на імпартныя.

Далей - больш. Прама нязручна пералічваць... 13 чэрвеня (напэўна, дзень нядобры) зламаўся кандыцыянер, 26 - турбакампрэсар... Астатнія назвы дэталяў, якія выйшлі са строю, шчыра кажучы, і запомніць цяжка. А дробязных паломак было яшчэ некалькі. Адказныя за гарантыйны рамонт усё дапытваліся ў рагазнянскага старшыні, а ці няма ў таго ворагаў? Задавалі амаль палітычныя пытанні. Маўляў, а што, вы лічыце, што беларуская тэхніка дрэнная? І даказвалі, што яна... самая лепшая.

Трэба ведаць Семенюка. Ён не баіцца сказаць тое, што думае. Больш за 30 гадоў у гаспадарцы, 17 - кіраўніком. Шмат чаго нагледзеўся і наслухаўся за гэты час. Таму без хітрыкаў выказаў усё пра «сыры», недароблены трактар, з дадзенай маркай пакутуюць і ў іншых гаспадарках. Мадэль, на яго думку, на беларускую цуд-тэхніку відавочна не цягне.

Старшыня СВК «Рагазнянскае», дарэчы, не супраць беларускай тэхнікі. Кажа, калі збожжаўборачны камбайн «Палессе» добры, то ўсе яго з задавальненнем купляюць і хваляць. А калі «трыццатка» («Беларус» 3022 ДЦ, пра які ідзе гаворка) сканструяваная няўдала, у гэтым відавочна не вінаватыя тыя, хто працуе на зямлі. Набытыя 7 гадоў таму два сапраўдных амерыканскіх John Deere па гэты дзень (цьфу-цьфу!) і сеюць, і аруць хоць у дзве, хоць у тры змены. І сур'ёзных паломак за гэты час не было.

Аказваецца, «Беларус» дадзенай мадэлі яшчэ і гарыць. Такія выпадкі былі ў іншых гаспадарках. Мабыць, каб пазбегнуць падобнага ў «Рагазнянскім», прадстаўнікі камісіі параілі дадаткова ўсталяваць на тэхніку два надзейных вогнетушыцеля. Як гаворыцца, на ўсялякі выпадак. Толькі ў «Рагазнянскім» не зразумеюць, чаму «гасяць» ужо «ўскладненні», а не спрабуюць знайсці першапрычыну. Калі трактар не гатовы, на яго маса нараканняў, навошта яго навязваць гаспадаркам?

Малады спецыяліст, загадчык майстэрнямі «Рагазнянскага» Сяргей Карпінчык лічыць, што ў новым трактары няўдала скрыжавалі «вужа і вожыка». Рухавік на ім - нямецкі, усе шлангі, патрубкі і іншае злучальнае начынне - беларускія. Вось і не могуць яны ўжыцца паміж сабой, не падыходзяць адзін аднаму, злятаюць, як ні прыкручвай. А «заглыне» машына пылу (для гэтага дастаткова і пяці хвілін) - пішы прапала. Рухавік зноў выйдзе са строю. Увогуле, трэба або араць на асфальце, або ўвесь час выбягаць з кабіны і глядзець, а ці не адвалілася чаго. Толькі калі ў такім выпадку працаваць, у «Рагазнянскім» не разумеюць.