Берасцейскі гарвыканкам трапіў у недарэчную гісторыю

Берасцейскія чыноўнікі хочуць выселіць з кватэр жыхароў, якія ў іх не жывуць.

Працягваецца эпапея дома №10 на вуліцы Астроўскага ў Берасці, які мясцовыя ўлады раптоўна прызналі аварыйным і цяпер патрабуюць ад кватэранаймальнікаў вызваліць сваё жыллё ў цэнтры горада, перасяліўшыся на ўскраіну. Суд першай інстанцыі пакінуў без задавальнення скаргу жыхароў дома №10 на вуліцы Астроўскага, якія спрабавалі аспрэчыць пастанову гарвыканкама, хоць аўтары заявы звярталі ўвагу на дзіўны факт: дом быў прызнаны аварыйным пасля таго, як берасцейскія ўлады ўклалі інвестыцыйную дамову з прыватнай кампаніяй аб продажы гэтага будынка, які з'яўляецца гісторыка-культурнай каштоўнасцю. Гэта дало падставу жыхарам дома на вуліцы Астроўскага падаць яшчэ адну заяву ў суд, паводле якой адказчыкам выступае ўжо мясцовы аблвыканкам.

Гэты працэс абяцае быць гучным, але асноўныя слуханні яшчэ наперадзе. Аднак, як паведамляе карэспандэнт charter97.org, улады вырашылі згуляць на апярэджанне і падалі ў суд сваю позву, дамагаючыся высялення жыхароў з кватэр №3, 5 і 7 згаданага дома. Падчас першага паседжання высветлілася, што ў сваіх намерах Берасцейскі гарвыканкам трапіў у недарэчную гісторыю, паколькі патрабуе выселіць уласнікаў гэтых кватэр, якія ў іх не зарэгістраваныя і ў гэты час не жывуць (у рэчаіснасці там пражываюць чальцы іх сем'яў). Самі ўласнікі падалі пацвярджаючыя дакументы, чым паставілі ў тупік суддзю Алега Міранюка, вядомага ў Берасці тым, што ў шматлікіх рэзанансных справах выносіць выракі на карысць уладаў.

Аднак цяпер і ён не стаў даводзіць сітуацыю да абсурду і папракнуў прадстаўнікоў гарвыканкама ў нядбайнасці: як можна выселіць з кватэр людзей, якія ў іх не жывуць! У судовым пасяджэнні спатрэбіўся перапынак, падчас якога аўтар позвы ўдакладніў іскавыя патрабаванні і цяпер настойваў на высяленні ўжо не уладальнікаў кватэр (раз ужо яны зарэгістраваныя па іншых адрасах), а чальцоў з сем'яў, якія па-ранейшаму жывуць у доме на вуліцы Астроўскага.

Удакладненне позвы стварыла не менш парадаксальную сітуацыю. Адвакат адказчыкаў паставіў перад судом пытанне: у якасці каго чальцы сем'яў пераселяцца ў новае жыллё? Калі ў якасці ўласнікаў, то ці азначае гэта, што дзяржава падорыць ім кватэры? Акрамя гэтага адвакат звярнуў увагу на тое, што паводле закону высяленнем жыхароў павінна займацца фірма-інвестар, а не мясцовыя ўлады (бо атрымліваецца, што гарвыканкам гатовы выкарыстоўваць на гэтыя мэты бюджэтныя сродкі). Але суд адпаведнае хадайніцтва адхіліў і адклаў разгляд справы аб высяленні жыхароў з кватэр №3, 5 і 7 да ўдакладнення прававой пазіцыі гарвыканкама з улікам акалічнасцяў, якія памяняліся.