Сірыйская апазіцыя стварыла часовы ўрад

«Сірыйская нацыянальная кааліцыя» (СНК) стварыла ўрад, які будзе кіраваць тэрыторыяй краіны, вызваленай ад улады Асада.

Ён быў сфармаваны пасля гарачых трохдзённых перамоў у Стамбуле. СНК удалося, нарэшце, стварыць часовы ўрад, нягледзячы на негатыўнае стаўленне шэрагу заходніх краін да гэтага працэсу, піша Reuters.

ЗША і іх саюзнікі мяркуюць, што заўчаснае стварэнне падобнага органа можа падарваць перамовы паміж афіцыйным Дамаскам і паўстанцамі, перадае РБК.

Напярэдадні стала вядома, што сірыйская апазіцыя пагадзілася прыняць удзел у перамовах з урадам Башара Асада ў ходзе міжнароднай канферэнцыі «Жэнева-2». Як чакаецца, сустрэча пройдзе ў канцы лістапада 2013 года.

Сірыйская нацыянальная кааліцыя апазіцыйных і рэвалюцыйных сіл была створана ў лістападзе 2012 года ў спробе аб'яднаць апазіцыйныя сілы ў Сірыі. Кааліцыя не карыстаецца падтрымкай шэрагу ісламісцкіх груповак, якія выступаюць за звяржэнне Асада, у тым ліку супраць кааліцыі выступае «Фронт Аль-Нусра», прызнаны тэрарыстычнай арганізацыяй у шэрагу краін.

Арганізацыяй жэнеўскай канферэнцыі па мірным урэгуляванні канфлікту ў Сірыі займаюцца ЗША і Расея. Чакаецца, што яна адбудзецца ў лістападзе 2013 года, аднак дакладныя даты правядзення канферэнцыі не зацверджаныя.

Канфлікт паміж прыхільнікамі і праціўнікамі Асада, перарос у грамадзянскую вайну, якая працягваецца ў Сірыі з сакавіка 2011 года. Па дадзеных ААН, з пачатку ваенных дзеянняў у Сірыі загінулі не менш за 80 тысяч чалавек. Велікабрытанія і ЗША заявілі пра магчымасць паставак узбраення апазіцыі пасля інфармацыі аб ужыванні войскамі Асада хімічнай зброі.

Афіцыйны Менск неаднаразова заяўляў пра сваю падтрымку сірыйскага рэжыму. Многія эксперты і міжнародныя арганізацыі заяўляюць пра тое, што Беларусь пастаўляе зброю Асаду ў абыход міжнародных санкцый, а спецыялісты з нашай краіны працуюць на ваенных аб'ектах у Сірыі.