Беларускія навукоўцы вераць: Хутка павінна «прарваць» дыяментамі

У Мінпрыроды спадзяюцца знайсці ў Беларусі буйныя радовішчы алмазаў.

Навукоўцы з дапамогай сейсмічных выбухаў правялі вывучэнне зямной кары на глыбіні 30-50 км на адрэзку Чарнігаў - Капыль.

Гэта частка працяглай працы па пошуку вуглевадародаў. Далейшае асваенне патэнцыйных карысных выкапняў - справа будучыні, калі з'явяцца тэхналогіі, якія дазваляюць здабываць гэтыя карысныя выкапні на такіх глыбінях.

- У Беларусі ёсць тое, пра што мы ўсе даўно ведаем, - калійныя солі напрыклад, але ёсць і праявы нетрадыцыйных карысных выкапняў. А менавіта перадумовы выяўлення радовішчаў алюмініевай сыравіны, нетрадыцыйных вуглевадародаў, пра якія сёння кажа ўвесь свет, - сланцавых нафты і газу, - распавёў у інтэрв'ю «Рэспублiцы» начальнік Упраўлення па геалогіі Мінпрыроды Уладзімір Варакса.

Паводле слоў спецыяліста, патэнцыял Беларусі ацэньваўся яшчэ ў часы СССР. Тады падыходы і тэхналогіі былі іншыя. Не было сэнсу на вялікіх глыбінях шукаць бедныя радовішчы рудных карысных выкапняў, калі больш багатыя былі разведаныя ў іншых рэгіёнах. Таму многія перспектыўныя тэрыторыі Беларусі былі прапушчаныя і на час забытыя. Але такая сітуацыя ва ўсіх краінах свету: штосьці выкарыстоўваецца сёння, штосьці кладзецца ў скарбонку на будучыню, калі зменяцца глыбіня свідравання, дакладнасць вымярэнняў і г. д. Пераацэнка адбываецца кожныя 25-30 гадоў.

- Нетры Беларусі раз-пораз падаюць сюрпрызы спецыялістам: то адкрытае новае перспектыўнае нафтавае радовішча, а гэта значыць перадумовы выяўлення беларускіх алмазаў…

- Пытанне пошукаў радовішчаў алмазаў – карпатлівае і доўгае, патрабуе значных фінансавых укладанняў. У канцы 1990-х быў час, калі працы па пошуку трубак выбуху - патэнцыйных радовішчаў алмазаў - ішлі больш інтэнсіўна. Хачу ўдакладніць: не ўсе трубкі выбуху з'яўляюцца алмазаноснымі. Па міжнароднай статыстыцы, гэта толькі адна трубка са 110. У Беларусі пакуль знойдзена 33 трубкі выбуху, у васьмі выяўленыя рэдкія дробныя алмазы, але ні адна з трубак не ўяўляе прамысловай каштоўнасці, - канстатуе Уладзімір Варакса. - На гэтым з-за недахопу фінансавых сродкаў мы пакуль спыніліся. Зараз вядуцца апераджальныя працы. Апошнія два гады ў рамках дзяржаўнай праграмы за кошт сродкаў бюджэту на перспектыўных тэрыторыях мы вядзем аэрамагнітную здымку, выяўляючы ўчасткі, дзе могуць быць новыя трубкі. Магчыма, пасля да гэтай працы можна будзе прыцягнуць інвестараў.