Dzіeciuki закончылі тур па Польшчы канцэртам у Варшаве
- 18.11.2013, 18:44
- 5,669
Беларускамоўныя панкі з Гародні выступілі ў польскай сталіцы разам з гуртом The Ukrainians.
Канцэрт адбыўся ў клубе CDQ.
«Тур выдаўся вельмі добры, была выдатная падтрымка з боку палякаў і беларусаў. Мне асабіста больш за ўсё спадабалася ў мястэчку Пчолкі (Pszczółki) на Памор'і - там быў проста агонь», - сказаў у інтэрв'ю сайту charter97.org вакаліст гурта Dzieciuki Павел «Трабл».
Гітарыст гарадзенскага калектыву Алесь Дзянісаў адзначыў, што ў Польшчы гурт выступае часцей чым у Беларусі.
«Мы не ставім такой мэты, і, вядома, нам хацелася б больш граць у Беларусі, але з розных прычын выпадае так, як ёсць. Нам вельмі падабаецца граць у маленькіх гарадах: там вельмі ўтульна, нас вельмі добра прымаюць і на канцэрты прыходзяць людзі самага рознага веку. Нам таксама было вельмі прыемна граць на адной сцэне з The Ukrainians з Вялікабрытаніі. Гэта адзін з трох гуртоў, з якімі я хацеў выступіць разам», - падкрэсліў ён.
Алесь Дзянісаў дадаў, што цяпер расце спажывецкае пакаленне, і шмат маладых людзей думае, што за іх усё зробяць і ўсё прынясуць на сподачку.
«Маладыя гурты і выканаўцы думаюць, што зараз знойдуць нейкага прадусара і раскруцяцца як, напрыклад, Макс Корж. Вядома, што большасць з іх не знойдзе ніякіх прадусараў. Для нас мэта ў тым, што мы робім, і мы атрымліваем ад гэтага кайф. Гэта наша жыццё, і мы будзем граць, а не сядзець і чакаць прадусара, які нас кудысьці вывезе», - падрахаваў гітарыст пан-рок гурта з Гародні.
Нагадаем, інтэрв'ю з музыкамі гурта Dzieciuki было апублікавана на сайце charter97.org.