Оперны флэш-моб у менскім гіпермаркеце (Відэа)
32- 23.11.2013, 8:54
- 16,521
У гіпермаркеце Bigzz гучала опера Станіслава Манюшкі.
Артысты камернага музычнага тэатра «Галерэя» пры падтрымцы музычнага дома «Класіка» зладзілі першы ў Беларусі оперны флэш-моб, піша БелаПАН.
Імправізаваны канцэрт стаў нечаканасцю для наведвальнікаў менскага гіпермаркета. Замест таго каб займацца шопінгам, пакупнікі захоплена слухалі артыстаў, якія раптам апынуліся сярод іх.
Фрагменты з оперы Станіслава Манюшкі Verbum nobile, знакамітыя хіты Лучана Павароці і Фрэнка Сінатры, выкананыя маладымі вакалістамі і ўжо масцітымі спевакамі пад акампанемент камернага аркестра, прымусілі менчукоў забыцца пра справы і занурыцца ў свет музыкі.
Такім чынам артысты «Галерэі» запрасілі ўсіх пераканацца ў тым, што опернае мастацтва даступнае кожнаму і кожны зможа знайсці ў ім штосьці цікавае для сябе.
Праверыць гэта сцверджанне можна таксама 24 лістапада ў Рэспубліканскім палацы культуры прафсаюзаў на прэм'еры лірыка-камедыйнай оперы Verbum nobile і 17 снежня на тэатралізаваным канцэрце «Музычная дуэль Павароці і Сінатры».