Праваабаронца пратэстуе супраць дыскрымінацыі мужчын

Сяргей Усцінаў звярнуўся ў Канстытуцыйны суд з патрабаваннем разгледзець адпаведнасць Канстытуцыі аднаму з артыкулаў КоАП.

Пра гэта ён распавёў сайту charter97.org.

У адпаведнасці з ч.2 арт.6.7 КоАП, адміністрацыйны арышт не можа прымяняцца да цяжарных жанчын, інвалідаў I і II групы, жанчын і адзінокіх мужчын, якія маюць на ўтрыманні непаўналетніх дзяцей або дзяцей-інвалідаў.

Сяргей Усцінаў сцвярджае, што палажэнне ч.2 арт.6.7 КоАП з'яўляецца дыскрымінацыйным у адносінах да неадзінокіх мужчын, якія маюць на ўтрыманні непаўналетніх дзяцей, або дзяцей-інвалідаў.

«Чамусьці заканадаўцы палічылі, што неадзінокі мужчына, які мае на ўтрыманні непаўналетніх дзяцей, або дзяцей-інвалідаў, чымсьці горш адзінокага мужчыны ці ж не адзінокай жанчыны, якія маюць на ўтрыманні непаўналетніх дзяцей або дзяцей- інвалідаў. І паколькі ён горш, то яго можна падвергнуць адміністрацыйнаму спагнанню ў выглядзе адміністрацыйнага арышту. Тут відавочнае парушэнне права на роўнасць перад законам неадзінокіх мужчын у адносінах да неадзінокіх жанчын і адзінокіх мужчын, якія маюць на ўтрыманні непаўналетніх дзяцей, або дзяцей-інвалідаў», - сказаў Сяргей Усцінаў.

Праваабаронца таксама лічыць, што ч.2 арт.6.7 КоАП парушае правы мужчыны, які мае на ўтрыманні непаўналетніх дзяцей, на роўнасць правоў і абавязкаў абодвух бацькоў. У адпаведнасці з ч.1 арт.76 Кодэкса Рэспублікі Беларусь аб шлюбе і сям'і, бацька і маці маюць роўныя правы і абавязкі ў дачыненні да сваіх дзяцей.

«Калі глядзець яшчэ глыбей, то магчымасць арыштоўваць неадзінокіх мужчын, якія маюць на ўтрыманні непаўналетніх дзяцей, або дзяцей-інвалідаў, не дазваляе бацьку выконваць свае абавязкі па клопаце пра здароўе, фізічнае, разумовае і духоўнае развіццё дзяцей. А возьмем напрыклад шматдзетную сям'ю, у якой працуе маці, а бацька ажыццяўляе догляд за дзецьмі? У гэтым выпадку дзеці наогул застаюцца без нагляду бацькоў. Ужо прайшлі тыя часы, калі лічылася, што за дзецьмі даглядае толькі мама.

Заканадаўцы не прадугледзелі ўсіх нюансаў пры напісанні ч.2 арт.6.7 КоАП, таму гэтая норма павінны быць прызнаная неканстытуцыйнай і змененая з улікам усяго вышэйпералічанага», - заяўляе юрыст.

Праваабаронца спадзяецца, што суддзі Канстытуцыйнага Суда Рэспублікі Беларусь не будуць ігнараваць яго зварот, а прыслухаюцца і вынесуць адпаведнае рашэнне. Бо і раней Канстытуцыйны Суд не раз выносіў рашэнні, у аснову якіх клаліся звароты грамадзян.