60 сем'яў пазбавіліся кватэр за даўгі па «камуналцы»

«Злосныя неплацельшчыкі» пазбаўленыя сваіх кватэр і былі пераселеныя ў жыллё меншай плошчы.

Як правіла, суды прымаюць рашэнне аб перасяленні даўжнікоў праз некалькі месяцаў пасля падачы пазову. Пры гэтым неплацельшчыкам даецца магчымасць пагасіць доўг.

Усяго за 10 месяцаў 2013 года было пададзена 393 пазовы аб высяленні, пераселеныя па рашэннях суда 64 сям'і. Большасць з 64 «злосных даўжнікоў» - праблемныя сем'і, якія вядуць асацыяльны лад жыцця, злоўжываюць спіртнымі напоямі, піша БелТА.

У новым Жыллёвым кодэксе Беларусі, які ўступіў у сілу 2 сакавіка 2013 года, прадугледжаная магчымасць прымусовага высялення ўласніка кватэры, калі маецца без паважных прычын шасцімесячная запазычанасць за жыллёва-камунальныя паслугі, а таксама калі невыкананне абавязкаў па ўтрыманні жылога памяшкання робіць немагчымым пражыванне ў доме і кватэры іншых людзей.

Мясцовыя выканкамы ў дачыненні да ўласнікаў жылля з шасцімесячнай запазычанасцю за жыллёва-камунальныя паслугі ў сакавіку-кастрычніку гэтага года падалі 94 пазовы аб прымусе да адчужэння жылога памяшкання. Калі на працягу года гэтыя кватэры не будуць адчужаныя або ўласнікі не пагасяць запазычанасць у поўным памеры, мясцовыя органы ўлады маюць права падаць у суд пазоў аб прымусовым продажы жылога памяшкання з публічных таргоў.

У групу рызыкі па стане на 1 лістапада 2013 года ўваходзяць ужо 20,3 тысячы ўласнікаў жылля, якія маюць шасцімесячную запазычанасць па плаце за жыллёва-камунальныя паслугі. У цэлым пратэрмінаваная запазычанасць насельніцтва Беларусі па аплаце на 1 лістапада маецца на 150 тысячах асабовых рахункаў (5% агульнай колькасці), з іх 32,6 тысячы (21,7%) аднесеныя да разраду злосных неплацельшчыкаў.