Атрымаў арэнднае жыллё - больш не льготнік

Атрыманне арэнднага жылля будзе лічыцца паляпшэннем жыллёвых умоў з наступным здыманнем з чаргі маючых патрэбу.

Пра гэта Лукашэнка заявіў на нарадзе аб фармаванні фонду жылых памяшканняў камерцыйнага выкарыстання.

На мерапрыемства былі запрошаныя кіраўнік адміністрацыі Андрэй Кабякоў, віцэ-прэм'ер Анатоль Калінін, старшыня Менгарвыканкама Мікалай Ладуцька і міністр жыллёва-камунальнай гаспадаркі Андрэй Шорац.

Лукашэнка падкрэсліў, што ў Беларусі жыллёвае будаўніцтва ўжо не адзін год знаходзіцца ў ліку галоўных прыярытэтаў.

«Мы зусім нядаўна заявілі пра тое, што будзем выкарыстоўваць новую форму - узвядзенне і пашырэнне аб'ёмаў арэнднага жылля. Гэта запатрабавала і распрацоўкі адпаведнага нарматыўнага акту, каб увесці ў прававое поле новыя працэсы, - адзначыў ён. - Перш чым прыняць канчатковае рашэнне па гэтым вельмі важным пытанні, я хацеў бы пачуць пра тое, ці ўсё тут выверана і прадумана, каб нам не давялося праз месяц ці паўгода, як гэта ў нас часта бывае, уносіць нейкія змены, дапаўненні, а яшчэ горш - адступаць ад тых рашэнняў, якія мы можам сёння прыняць».

Урад падрыхтаваў праект указа «Аб некаторых пытаннях прававога рэгулявання жыллёвых адносін». Паводле слоў Лукашэнкі, прапановы ўносяць сур'ёзныя змены ў жыллёвую палітыку. Па сутнасці, прапануецца новы падыход да фармавання фонду жылля камерцыйнага выкарыстання або так званага арэнднага жылля.

Лукашэнка пералічыў шэраг мер, якія прапануюцца праектам дакумента. Па-першае, што тычыцца стварэння фонду арэнднага жылля, да 1 красавіка 2014 года плануецца перавесці ў яго ўсё заселеныя службовыя і спецыяльныя жылыя памяшканні. А пасля 1 ліпеня 2016 года - уключыць у гэты фонд і непрыватызаваныя на гэтую дату грамадзянамі дзяржаўныя кватэры, якіх налічваецца каля 330 тыс. «Не прыватызуюць, значыць, мы ўсё туды ўключым, зробім гэта дзяржаўнае жыллё арэндным, і плата за гэтыя кватэры будзе як за арэнднае жыллё», - сказаў ён.

Па-другое, устанаўліваецца пералік грамадзян, якія маюць права на прадастаўленне арэнднага жылля. Да таго ж мяркуецца, што атрыманне арэнднага жылля будзе лічыцца паляпшэннем жыллёвых умоў з наступным здыманнем з чаргі маючых патрэбу. «Гэта само сабой зразумела. Атрымаў кватэру, тым больш што мы дамовіліся пра тое, што кошт арэнднага жылля будзе ніжэй, чым сёння рынкавы прыкладна напалову. Натуральна, што гэта будзе паляпшэнне. Якія яшчэ чэргі і льготы?» - сказаў ён.

Па-трэцяе, вызначаецца памер платы за карыстанне арэндным жыллём. Пры гэтым аблвыканкамы і Менгарвыканкам будуць мець права ўстанаўліваць паніжальныя і павышальныя каэфіцыенты.

Пераглядаюцца таксама падставы для пастаноўкі на ўлік маючых патрэбу ў паляпшэнні жылля з мэтай вызначаць рэальныя патрэбнасці людзей і выключыць неабгрунтаваныя дамаганні. «Гэта таксама правільна. Шарлатанства быць не павінна. Беларусь з'яўляецца адной з нямногіх дзяржаў, дзе прадастаўленыя падобныя льготы, дзе дзяржава прадастаўляе магчымасць на льготных умовах будаваць жыллё. Таму тут павінна быць усё сумленна і справядліва», - заявіў кіраўнік.

Лукашэнка звярнуў асаблівую ўвагу кіраўніка сваёй адміністрацыі на неабходнасць навядзення парадку ва ўліку маючых патрэбу ў паляпшэнні жыллёвых умоў.