«Вертыкальшчык» прыбраў да рук элітную кватэру ў Менску

СК завяршыў расследаванне крымінальнай справы ў дачыненні да былога намесніка старшыні Менскага раённага выканаўчага камітэта.

«Галоўным упраўленнем па расследаванні злачынстваў у сферы арганізаванай злачыннасці і карупцыі завершанае расследаванне крымінальнай справы ў дачыненні да былога намесніка старшыні Менскага райвыканкама», - паведамілі агенцтву «Інтэрфакс-Захад» у сераду ў аддзеле інфармацыі і сувязі з грамадскасцю Следчага камітэта Беларусі.

«Матэрыялы крымінальнай справы перададзеныя пракурору для накіравання ў суд», - адзначылі ў СК.

«Папярэдняе расследаванне ўстанавіла, што службовая асоба, злоўжываючы сваімі паўнамоцтвамі, выкарыстоўвала службовае становішча для вырашэння пытанняў, звязаных з жыллёвымі праваадносінамі, у асабістых мэтах і ў інтарэсах сваіх сваякоў», - праінфармавалі ў Следчым камітэце.

«Паводле атрыманых дадзеных, вышэйпаказаная службовая асоба, выкарыстоўваючы шырокі інструментар для ўвядзення ў зман іншых службовых асоб, незаконна набыла ў 2007 годзе ва ўласнасць трохпакаёвую кватэру дзяржаўнага жыллёвага фонду на вул. Захарава ў Менску, плошчай больш за 100 квадратных метраў», - адзначылі ў СК.

«Акрамя таго, чыноўнік аказаў садзейнічанне сваякам і трэцім асобам у незаконным атрыманні зямельных участкаў у Менскім раёне, а таксама ў неправамернай пастаноўцы на ўлік маючых патрэбу ў паляпшэнні жыллёвых умоваў», - паведамілі ў камітэце.

«Следства прад'явіла былому чыноўніку абвінавачанне ў злоўжыванні службовымі паўнамоцтвамі, перавышэнні ўлады і службовых паўнамоцтваў, здзейсненымі з карыслівай і іншай асабістай зацікаўленасці асобай, якая займае адказнае становішча», - праінфармавалі ў СК.

«У Менскі раённы выканаўчы камітэт накіраванае прадстаўленне аб ліквідацыі прычын і ўмоў, якія садзейнічалі здзяйсненню дадзенага злачынства», - паведамілі ў Следчым камітэце.