Больш за 400 прадпрымальнікаў з'ехаліся на форум у Менск

Форум на тэму «Тэхнічны рэгламент Мытнага саюза - беларускае пытанне» праходзіць сёння ў гасцініцы «Юбілейная».

Сустрэча прысвечаная праблемам увядзення тэхрэгламенту МС па бяспецы прадукцыі лёгкай прамысловасці.

Арганізатарам мерапрыемства выступіла РГА «Перспектыва». На форум прыехалі прадпрымальнікі з Менска, Віцебска, Гродна, Гомеля, Брэста, Рагачова, Пінска, Слоніма, Маладзечна, Оршы, Мядзеля, Салігорска і Смалявічаў. Запрошаныя прадстаўнікі Дзяржкамітэта па стандартызацыі, Мінгандлю і Мінэканомікі мерапрыемства праігнаравалі, піша БелаПАН.

Адкрываючы форум, старшыня савета РГА «Перспектыва» Анатоль Шумчанка нагадаў, што 31 кастрычніка віцэ-прэм'ер Пётр Пракаповіч, кіраўнік Савета па развіцці прадпрымальніцтва, паведаміў аб уступленні ў сілу патрабаванняў тэхрэгламенту аб бяспецы тавараў лёгкай прамысловасці ўжо з 1 снежня 2013 года. І гэта нягледзячы на тое, адзначыў Шумчанка, што раней з профільнымі дзяржорганамі была дасягнутая дамоўленасць: прадпрымальнікі змогуць працаваць па старых правілах да 1 ліпеня 2014 года.

«Гэта вераломная заява была зробленая вельмі несвоечасова, - падкрэсліў Шумчанка. - За ўвесь час прэзідэнцтва спадара Лукашэнкі такога не было. Так, паміж намі былі непаразуменні, але калі мы сядалі за стол перамоваў, то пасля выконваліся ўсе дамоўленасці».

Па звестках лідара «Перспектывы», Міністэрства эканомікі раней прапаноўвала ўраду ўвесці такую сістэму, пры якой прадпрымальнік мог бы сам пацвярджаць паходжанне сваіх тавараў без правядзення сертыфікацыі, аднак гэту прапанову не падтрымалі іншыя дзяржведамствы.

«Па нашай інфармацыі, не ўсе органы ўлады падзяляюць пазіцыю Пракаповіча, - сказаў Шумчанка. - А значыць, у нас ёсць шанец урэгуляваць гэтую сітуацыю, якая ў іншым выпадку прывядзе да калапсу ўсёй прадпрымальніцкай супольнасці ў Беларусі».

Тэхрэгламент МС аб прадукцыі легпрама ўступіў у сілу 1 ліпеня 2012 года. Для паэтапнага пераходу да адзіных патрабаванняў да 1 студзеня 2013 года дапушчалася вытворчасць і выпуск у абарачэнне на тэрыторыі МС прадукцыі, якая не належыць да ўступлення ў сілу тэхрэгламенту абавязковай ацэнцы (пацвярджэнню) адпаведнасці. У Беларусі для ІП - плацельшчыкаў адзінага падатку гэты перыяд быў падоўжаны да 1 ліпеня 2013 года.

Яшчэ адзін пераходны перыяд тычыцца прадукцыі, на якую да ўвядзення тэхрэгламенту былі выдадзеныя або зарэгістраваныя дакументы аб пацвярджэнні адпаведнасці абавязковым патрабаванням, раней устаноўленым нарматыўнымі прававымі актамі МС або заканадаўствам дзяржавы - члена МС. Вытворчасць і выпуск у абарачэнне такой прадукцыі дапускаецца да 1 ліпеня 2014 года.

Увядзенне патрабаванняў тэхрэгламенту МС выклікала пратэсты індывідуальных прадпрымальнікаў (ІП). Абавязваючы вырабляць дарагую працэдуру сертыфікацыі тавараў, лічаць яны, улады ставяць іх на мяжу выжывання. У канцы чэрвеня - пачатку ліпеня на рынку і ў гандлёвых цэнтрах Беларусі прайшлі забастоўкі.

У выніку тры міністэрства - гандлю, аховы здароўя, сельскай гаспадаркі і харчавання - і Дзяржкамітэт па стандартызацыі прынялі сумесную пастанову аб аптымізацыі пераходу да патрабаванняў тэхрэгламенту. Дакумент спрасціў для ІП працэдуру сертыфікацыі ў адпаведнасці з патрабаваннямі тэхрэгламенту пры ўмове прадастаўлення імі суправаджальных дакументаў на тавары.

Да 1 лістапада 2013 года Міністэрства гандлю і Дзяржкамітэт па стандартызацыі дамовіліся не правяраць тавары лёгкай прамысловасці, якія рэалізуюцца ІП, на адпаведнасць патрабаванням тэхрэгламенту. Пасля гэтай даты прадпрымальнікі павінны прад'яўляць суправаджальныя дакументы, якія пацвярджаюць куплю тавару на тэрыторыі краін МС.