Пад Гомелем у міліцыянта скралі аўто, ліхтарык і тэлефон

У Кармянскім раёне стрыечныя браты збілі міліцыянта, выкралі ягоны службовы аўтамабіль і патрапілі на ім у аварыю.

Кармянскім РАСК распачата некалькі спраў у дачыненні да 25-гадовага жыхара Кармянскага раёна і ягонага стрыечнага брата, 22-гадовага гамелчука. Яны збілі міліцыянта (арт.364 КК), абрабавалі яго (ч.2 арт.206 КК), выкралі аўтамабіль (ч.2 арт.214 КК), а таксама скралі спецабсталяванне (ч.2 арт.205 КК).

Як паведаміла БелаПАН афіцыйная прадстаўнічка ўправы Следчага камітэта Гомельскай вобласці Марыя Крываногава, абвінавачаных затрымалі, і яны знаходзяцца ў следчым ізалятары.

Міліцыянты, супрацоўнікі Кармянскага РАУС, знаходзіліся на дзяжурстве, калі іх увагу прыцягнуў аўтамабіль «ВАЗ -2103». Неаднаразовыя патрабаванні міліцыі спыніцца, у тым ліку з выкарыстаннем гучнай сувязі, кіроўца «ВАЗа» праігнараваў. Пачаўся ягоны пераслед.

У адной з вёсак раёна п'яная кампанія выскачыла з аўтамабіля і кінулася хто куды. Міліцыянт дагнаў аднаго з уцекачоў. Аднак на дапамогу затрыманаму падаспеў яго стрыечны брат, другі ўдзельнік п'янай кампаніі. Ён ударыў міліцыянта. У працэсе бойкі браты публічна выкралі ў міліцыянта мабільны тэлефон і ліхтарык. Яны ўцяклі, а затым скралі службовы міліцэйскі аўтамабіль. Абвінавачаны, які сядзеў за стырном не справіўся з кіраваннем, аўтамабіль перакуліўся. Браты выбраліся з аўто і схаваліся. Яны былі затрыманыя міліцыяй на наступны дзень.

Трэці ўдзельнік п'янай кампаніі быў затрыманы другім міліцыянтам на месцы здарэння, калі спрабаваў уцячы пасля спынення аўтамабіля. Ён будзе прыцягнуты да адміністрацыйнай адказнасці.