У Беларусі з'явіцца «туркменская выспачка»

Лукашэнка зрабіў нечаканы падарунак Бердымухамедаву падчас свайго візіту ў Ашхабад.

Лукашэнка прапанаваў стварыць для туркменскіх студэнтаў, якія навучаюцца ў Беларусі, спецыяльны куток, паведамляе БелТА. «Мы і далей будзем вельмі чуйна рэагаваць на вашыя просьбы, рабіць усё, што пажадае Туркменістанская старана для стварэння і развіцця супольных вытворчасцей, як у Беларусі, так і ў Туркменістане», - заявіў ён на перамовах з прэзідэнтам Туркменістана Гурбангулы Бердымухамедавым.

Лукашэнка прапанаваў стварыць у Беларусі своеасаблівую моладзевую «туркменскую выспачку, дзе былі б, напрыклад, інтэрнаты ці гатэлі для гэтых хлопцаў».

Ён падкрэсліў важнасць захавання сяброўскіх стасункаў паміж Беларуссю і Туркменістанам, якія з'яўляюцца асновай у развіцці дзвюхстаронняга супрацоўніцтва. «Нашая ідэалогія - звязаць народы так, каб ніхто ніколі не адважыўся парушыць нашую дружбу, - сказаў Аляксандр Лукашэнка. - Я мяркую, у нас добрыя стасункі, нават, можна сказаць, узорныя. З іх можна браць прыклад».

Што да сферы палітыкі і дыпламатыі, правадыр падкрэсліў, што ў Беларусі і Туркменістана ніколі не было на гэты конт рознагалоссяў, стораны маюць аднолькавыя погляды на міжнародны парадак дня і актыўна падтрымліваюць адна адную на пляцоўках розных міжнародных арганізацый.