Былы намеснік старшыні Барысаўскага выканкама абвінавачваецца па пяці артыкулах
19- 8.11.2013, 11:21
- 18,508
Упраўленнем СК па Менскай вобласці скончанае папярэдняе следства па крымінальнай справе супраць былога намесніка старшыні Барысаўскага раённага выканкама.
Пра гэта паведаміла агенцтву «Інтэрфакс-Захад» у пятніцу афіцыйны прадстаўнік УСК па Менскай вобласці Таццяна Беланог.
«Матэрыялы крымінальнай справы ў дачыненні да былога чыноўніка перададзеныя ў пракуратуру для накіравання ў суд. Абраная мера стрымання ў выглядзе заключэння пад вартай у дачыненні да абвінавачанага не змянялася», - адзначыла Т.Беланог.
Паводле яе слоў, «у працэсе расследавання крымінальнай справы следствам выяўленыя дадатковыя эпізоды супрацьпраўнай дзейнасці абвінавачанага - больш за 10 злачынстваў, звязаных з атрыманнем буйных хабараў, два злачынствы, якія тычацца перавышэння ўлады і службовых паўнамоцтваў, эпізод з незаконным набыццём, захоўваннем, перавозкай і нашэннем боепрыпасаў і замахам на махлярства».
«Агульная сума незаконна атрыманых службовай асобай грашовых сродкаў склала больш як $35 тыс.», - паведаміла Беланог.
Яна таксама праінфармавала, што «падчас папярэдняга расследавання праведзены вялікі аб'ём следчай працы, дапытана больш за 100 сведак, накладзены арышт на маёмасць і грашовыя сродкі абвінавачанага на суму звыш Br315 млн».
Былому чыноўніку прад'яўленае канчатковае абвінавачванне па 5 артыкулах Крымінальнага кодэкса - па ч.3 арт.430 «Атрыманне хабару», па ч.3 арт.426 (перавышэнне ўлады і службовых паўнамоцтваў, учыненае з карыслівай зацікаўленасці асобай, якая займае адказную пасаду), па ч.5 арт.16 , ч.2 арт.431 (падбухторванне да дачы хабару ў буйным памеры), па ч.1 арт.14 ч.3 арт.209 (замах на махлярства, здзейснены ў буйным памеры), па ч.2 арт.295 (незаконныя набыццё, захоўванне, перавозка і нашэнне боепрыпасаў).
Беланог нагадала, што супрацоўнікамі ўпраўлення па барацьбе з эканамічнымі злачынствамі УУС Менскага аблвыканкама чыноўнік быў затрыманы ў сваім службовым кабінеце пасля атрымання чарговага хабару за вырашэнне пытання, якое ўваходзіць у яго кампетэнцыю.