Новыя абмежаванні для прадпрымальнікаў

КДК прапануе забараніць зняцце індывідуальнымі прадпрымальнікамі з рахункаў у банках пэўнай сумы.

Пра гэта заявіў старшыня камітэта Аляксандр Якабсон 10 снежня на рэспубліканскай нарадзе па рашэнні праблем будаўнічай галіны і ўдасканаленні работы з кіруючымі кадрамі, паведаміла прэс-служба Лукашэнкі.

Па словах Якабсона, у гэтым заканадаўстве для ІП, у тым ліку для тых, якія аказваюць паслугі ў будаўніцтве, адсутнічаюць якія-небудзь абмежаванні па зняцці імі наяўных грашовых сродкаў з рахункаў. Чыноўнік лічыць, што гэта без цяжкасцяў дазваляе абнаяўніваць сродкі і выкарыстоўваць іх у нядобрых мэтах.

Абмежаванні, прапанаваныя КДК, на думку Якабсона, дапамогуць ліквідаваць умовы для атрымання незаконных даходаў і іх легалізацыі. Ён таксама паведаміў, што КДК унёс адпаведныя прапановы, аднак урад пакуль не прыняў канчатковае рашэнне.

Па дадзеных КДК, за 11 месяцаў 2013 года ў будаўнічай галіне органамі фінансавых расследаванняў выяўлена 103 злачынства эканамічнай накіраванасці, 19 крымінальных спраў ужо разглядаюцца судамі, фігурантам гэтых спраў пагражаюць рэальныя тэрміны. Па астатніх выяўленых фактах вядзецца папярэдняе расследаванне, пад вартай знаходзіцца восем чалавек.

Яшчэ 340 злачынстваў, паведаміў Якабсон, выяўлена іншымі праваахоўнымі структурамі. Па выніках праверак КДК за правапарушэнні і правіны ў сферы будаўніцтва да адміністрацыйнай адказнасці прыцягнута 368 чалавек, да дысцыплінарнай - 353 чалавекі, пры гэтым у даход дзяржавы канфіскавана больш за 80 млрд. рублёў, папярэджана неабгрунтаваных выдаткаў амаль на суму 200 млрд.

Большасць правапарушэнняў і злачынстваў, адзначыў Якабсон, звязаныя з карупцыйнымі праявамі, выкарыстаннем ілжэструктур з мэтай сыходу ад падаткаў і атрымання наяўнай часткі грашовых сродкаў, махлярствам і крадзяжамі, завышэннем аб'ёмаў і кошту праектных і будаўнічых работ, абсталявання і матэрыялаў, незаконнай прадпрымальніцкай дзейнасцю, парушэннем патрабаванняў тэхнічных нарматыўных актаў у галіне будаўніцтва, нямэтавым выкарыстаннем сродкаў грамадзян, якія будуюць жыллё.