Валавы знешні доўг вырас да $37 мільярдаў
27- 14.12.2013, 17:04
- 24,820
Валавы знешні доўг Беларусі за III квартал павялічыўся на $1 млрд 883,3 млн або на 5,3%.
На 1 кастрычнік 2013 года ён склаў $37 млрд 98,2 млн. З пачатку года знешні доўг вырас на $3 млрд 332,2 або на 9,8%. Пра гэта паведамляецца ў статыстычнай справаздачы Нацыянальнага банка рэспублікі.
Паводле звестак НББ, на 1 кастрычніка доўгатэрміновы знешні доўг склаў $23,06 млрд і вырас у параўнанні з пачаткам года на 10%, за III квартал прырост склаў 4,3%. Кароткатэрміновы знешні доўг склаў на 1 кастрычніка $14,04 млрд і вырас у параўнанні з пачаткам года на 9,6%, за III квартал прырост склаўся ў памеры 6,9%, піша «Інтэрфакс».
Як адзначаецца ў справаздачы, у III квартале банкаўскі сегмент рэспублікі прыцягнуў $1 млрд 127,7 млн, пры гэтым доўгатэрміновыя пазыкі склалі $766,5 млн, кароткатэрміновыя - $424,4 млн. Такім чынам, асноўнай прычынай прыросту валавога знешняга доўгу стала прыцягненне банкамі крэдытаў і пазык, у тым ліку кароткатэрміновых запазычанняў ад нерэзідэнтаў і матчыных кампаній.
Іншыя сектары эканомікі (у асноўным прамысловыя прадпрыемствы) прыцягнулі ў III квартале $336,7 у выглядзе доўгатэрміновых крэдытаў і пазык, а таксама $122,2 у выглядзе кароткатэрміновых запазычанняў і крэдытаў.
У III квартале Нацбанк на кароткатэрміновай аснове прыцягнуў $393,3 млн дэпазітаў і наяўнай валюты. Пры гэтым рэгулятарны орган пагасіў частку раней прыцягнутых доўгатэрміновых дэпазітаў і наяўных валютных сродкаў у памеры $34,6 млн.
Органы дзяржаўнага кіравання Беларусі ў III квартале знізілі аб'ём знешняга доўгу на $122,4 млн.
На пачатак 2013 валавы знешні доўг Беларусі склаў $34 млрд 116,2 млн (54% ВУП), павялічыўшыся за 2012 год на 0,3% пасля росту на 19,8% у 2011 годзе і на 28,8% у 2010 годзе.