«Нефрытавы заяц» прамахнуўся на 400 кіламетраў

Аматары астраноміі выявілі памылку пры пасадцы кітайскага месяцахода.

«Нефрытавы заяц» 14 снежня сеў на Месяц прыкладна ў 400 кіламетрах ад запланаванага месца пасадкі. Як паведаміў астраблогер zelenyikot, памылку вызначылі карыстальнікі амерыканскага форуму Unmannedspaceflight.com паводле відэа, зробленага пры спуску апарата.

Касмічны апарат «Чан'э-3» з «Юйту» на борце сеў на Месяц прыкладна ў 400 кіламетрах на ўсход ад кратэра Затока Вясёлкі ў Мора Дажджоў, дзе, паводле плана, павінна была адбыцца пасадка. Кітайскае агенцтва «Сіньхуа» раней паведаміла, што апарат шчасна спусціўся ў Затоцы Вясёлкі. Афіцыйнага пацверджання інфармацыі пра памылку не паступала, піша Lenta.ru.

«Чан'э-3» з першым кітайскім месяцаходам на борце быў запушчаны з касмадрома «Сычан» 1 снежня. У рамках дзяржаўнай месячнай праграмы мяркуецца ў 2020 годзе даставіць на Зямлю месяцовы грунт. Падчас гэтай праграмы ў 2007 годзе быў запушчаны «Чан'э-1», які склаў карту Месяца, а ў 2010 годзе «Чан'э-2» выбраў месца для пасадкі наступнага апарата.

Кітай стаў трэцяй краінай пасля СССР і ЗША, якой удалося паспяхова пасадзіць на паверхню Месяца касмічны апарат. Пасадка «Чан'э-3» лічыцца першым шчасным прызямленнем з 1976 года.