Трэць беларускіх прадпрыемстваў неплацежаздольныя

Неплацежаздольнымі з'яўляюцца больш трэці беларускіх прадпрыемстваў.

Пра гэта гаворыцца ў аналітычным аглядзе асноўных тэндэнцый у эканоміцы, падрыхтаваным Нацыянальным банкам.

«Больш за трэць прадпрыемстваў, якія ўлічваюцца ў бягучым парадку, з'яўляюцца неплацежаздольнымі (маюць адначасова каэфіцыент забяспечанасці ўласнымі абаротнымі сродкамі і каэфіцыент бягучай ліквіднасці ніжэй нарматыву)», - канстатуюць спецыялісты Нацыянальнага банка.

Па дадзеных Нацбанка, 2893 арганізацыі, або 35% ад агульнай колькасці, у гэтым годзе былі неплацежаздольнымі. Пры гэтым уласных абаротных сродкаў не мелі 1935 арганізацый (23,4%), забяспечанасць уласнымі абаротнымі сродкамі ніжэй нарматыву была ў 1304 прадпрыемстваў (15,8%), піша БелаПАН.

«Пра недастатковую эфектыўнасць фінансава-гаспадарчай дзейнасці прадпрыемстваў сведчыць высокая доля нерэнтабельных і нізкарэнтабельных прадпрыемстваў (па рэнтабельнасці продажаў), рост чыстых страт стратных прадпрыемстваў і іх доля ў агульным ліку», - гаворыцца ў аналітычным аглядзе Нацбанка.

Паводле яго дадзеных, тэмпы росту выручкі ад рэалізацыі і сабекошту рэалізаванай прадукцыі ў бягучым годзе былі вышэй тэмпу росту прыбытку ад рэалізацыі прадукцыі, «што прывяло да зніжэння ўзроўняў рэнтабельнасці» прадпрыемстваў.

Як паведамлялася раней, у бягучым годзе на фоне паніжэння знешняга попыту на беларускую прадукцыю адбыўся істотны рост складскіх запасаў на прамысловых прадпрыемствах. Як следства, у параўнанні з аналагічным перыядам мінулага года пагоршыліся фінансавыя вынікі дзейнасці беларускіх прадпрыемстваў.