МЗКЦ прадаюць расейскаму інвестару

Урад Беларусі дамовіўся аб продажы пакета акцый МЗКЦ расейскаму інвестару.

«Дасягнутыя дамоўленасці аб продажы пакета акцый ААТ «МЗКЦ» расейскаму інвестару па выніках правядзення дадатковай эмісіі акцый, якія размяшчаюцца па рынкавым кошце, з накірункам атрыманых сродкаў на мадэрнізацыю і тэхнічнае перааснашчэнне ААТ «МЗКЦ», - гаворыцца ў паведамленні прэс-службы беларускага ўрада па выніках пасяджэння прэзідыума Савета міністраў Беларусі па пытаннях рэалізацыі інтэграцыйных прамысловых праектаў з РФ.

«Рэалізацыя гэтага праекта плануецца ў 2014 годзе», - удакладнілі ў прэс-службе.

«Бакамі вызначаны парадак развіцця перспектыўнага мадэльнага шэрагу двух прадпрыемстваў, сумеснага стварэння новага пакалення гідрамеханічных трансмісій з фінансаваннем гэтага праекта за кошт сродкаў бюджэту «саюзнай дзяржавы», - падкрэсліваецца ў паведамленні.

Разам з тым, у пачатку снежня бягучага года Лукашэнка выступіў супраць продажу Менскага завода колавых цягачоў, заклікаўшы падумаць над гэтым пытаннем, піша «Інтэрфакс».

«Я, вядома, катэгарычна супраць гэтага», - заявіў Лукашэнка. «Мяне здзіўляе тая стараннасць, з якой сёння, не ведаю завод або ўрад, хочуць яго прадаць», - сказаў кіраўнік. Ён заклікаў старанна ўзважыць усе «за» і «супраць» продажу гэтага прадпрыемства. Пры гэтым, паводле слоў Лукашэнкі, «калі прадаваць, то трэба прадаваць не спажыўцам (прадукцыі МЗКЦ)».

Беларусь і Расея вялі перамовы аб стварэнні альянсу на базе МЗКЦ і расейскай дзяржкарпарацыі «Растэх».