Заўзятары ХК «Дынама-Менск» патрабуюць адстаўкі дырэктара

Фанаты клуба звярнуліся да прэзідэнта Федэрацыі хакея Беларусі з адкрытым лістом.

Ён размешчаны на сайце анлайн-петыцый.

«Сапраўдным лістом паведамляем, што мы, заўзятары ХК «Дынама Менск», збянтэжаныя і засмучаныя выступам любімай каманды ў рэгулярным чэмпіянаце КХЛ 2013-2014. У сувязі з сітуацыяй, якая склалася, хочам выказаць сваё меркаванне і дастукацца да кіраўніцтва клуба і Федэрацыі хакея Рэспублікі Беларусь, бо нам не абыякавы лёс каманды і ўсяго беларускага хакея. Мы заўсёды гатовыя падтрымліваць «Дынама», нават цяпер, калі для клуба наступілі не самыя лепшыя часы, бо сапраўдны заўзятар, заўсёды з камандай», - гаворыцца ў адкрытым лісце.

Заўзятары пералічылі, што менавіта выклікае іх абурэнне:

«Сумная, бяззубая з пункту гледжання выніку гульня каманды на выездах, дзе ў 17 матчах атрыманыя за ўсё 4 ачкі. Крыху лепш выглядае гульня каманды на Менск Арэне: 50% - набраных ачкоў;

стаўленне кіраўніцтва да заўзятараў, выяўленае практычна поўнай адсутнасцю дыялогу паміж першымі і апошнімі пасля закрыцця старонкі Івана Караічава на афіцыйным сайце;

правал селекцыйнай працы клуба, а менавіта - нездавальняючае ўкамплектаванне. Ратацыйная палітыка клуба, як паводле адносінаў да легіянераў, так і да беларускіх гульцоў, таксама пакідае жадаць лепшага».

Заўзятары адзначаюць, што ўсё названае вышэй негатыўна адбіваецца на наведванні матчаў на Менск Арэне, бо гэта наўпрост звязана з фінансавым складнікам клуба. У сезоне 2012/2013 гадоў. На Менск Арэне было 15 аншлагаў, што, несумненна, адбілася на фінансавых паказчыках ХК «Дынама Менск». У гэтым годзе сярэдняя наведвальнасць 10000-11000, і гэта з улікам прыцягнення адміністрацыйнага рэсурсу (салдат і школьнікаў). А пры далейшым пагаршэнні сітуацыі наведвальнасць будзе падаць, што, у сваю чаргу, прывядзе да вялікіх страт.

«Палітыка некаторых чыноўнікаў і кіруючых асоб, якая праяўлялася ў шэрагу папулісцкіх заяваў у пачатку сезона, абнадзейвала і выклікала некаторы аптымізм. І калі на старце чэмпіянату ўсе няўдачы можна было апраўдаць нешанцаваннем і неспрактыкаванасцю асобных хакеістаў, якія гуляюць на такім узроўні ўпершыню, то на сённяшні дзень гульня каманды цалкам адпавядае яе турнірнаму становішчу і ў большасці выпадкаў выклікае адно толькі расчараванне», - пішуць заўзятары.

Фанаты запатрабавалі:

- Публічнай заявы кіраўніцтва клуба аб выніках прамежкавага адрэзку чэмпіянату КХЛ, праведзенага ХК «Дынама-Менск», а таксама аб бліжэйшых планах клуба і яго будучыні ў КХЛ.

- Вызваліць ад займаемай пасады спартовага дырэктара О. Іванова за нездавальняючую селекцыйную працу, праведзеную ў міжсезонне і на працягу дзеючага чэмпіянату КХЛ. Сумніўныя падпісанні легіянераў (Джейкаб Мікфлікер, Дэрэк Міч, Эрык Шуінар, які не гуляў паўгода ў хакей) паводле рэкамендацыі невядомых асобаў, а таксама недагляд многіх кваліфікаваных беларускіх гульцоў і легіянераў (Уладзімір Дзянісаў, Аляксандр Кулакоў, Сяргей Дзямагін, Коры Мэрфі, Ерэ Каралахці), сведчаць аб поўнай некампетэнтнасці і адсутнасці прафесіяналізму ў гэтай сферы. Хацелася б убачыць на гэтай пасадзе дасведчанага менеджара-прафесіянала, бо непасрэдна ад яго працы залежыць выступ клуба ў лізе.

- Арганізаваць сустрэчу заўзятараў з кіраўніцтвам клуба і вядучымі гульцамі.

- Арганізаваць пісьменны фідбэк з заўзятарамі на афіцыйным сайце каманды.