«Белтэхагляд»: Такога наплыву не было ў апошнія пяць гадоў

З кожным днём чэргі перад станцыямі дыягностыкі становяцца ўсё больш.

Напярэдадні магчымага ўвядзення дзяржпошліны многія аўтаўладальнікі вырашылі прайсці тэхагляд цяпер, каб не пераплачваць. Самі супрацоўнікі «Белтэхагляду» кажуць, што такога наплыву не было апошнія пяць гадоў, піша onliner.by.

«Спрабуюць прайсці ТА не толькі звычайныя кіроўцы, але невялікія прыватныя транспартныя прадпрыемствы», - распавялі на адной з дыягнастычных станцый.

На многіх станцыях павялічаны працоўны дзень, некаторыя працавалі нават учора. Па папярэднім запісе месцы занятыя аж да 1 студзеня. Найбольшы попыт - у Менску. Некаторыя аўтаўладальнікі вырашаюцца ехаць у іншыя населеныя пункты, за 20-30 км, дзе чэргі не такія вялікія. Хоць у многіх раённых і абласных цэнтрах сітуацыя прыкладна такая ж, як у сталіцы.

Нагадаем, пасля абвяшчэння ставак дзяржпошліны (плаціць яе прыйдзецца пры праходжанні тэхагляду) адразу падлічылі, што цяпер прайсці тэхагляд вельмі нават выгадна. На дадзены момант гэта будзе каштаваць прыкладна 150 тыс. рублёў. Калі ж закон прымуць, то з 1 студзеня ўладальнік пазадарожніка масай больш за 3 тон за дазвол на два гады заплаціць 2,6 млн рублёў. А калі такі вялікі аўтамабіль зарэгістраваны на юрыдычную асобу, то ўвогуле 3,38 млн. На фоне чутак аб магчымым павышэнні базавай велічыні гэта толькі падагрэла ажыятаж.

«Калі цяпер велізарны ажыятаж, то ў студзені на станцыях дыягностыкі будзе пуста, - кажуць спецыялісты. - Многія наогул вырашылі не праходзіць тэхагляд (штрафы за яго не павялічваюцца). Раней такія аўтаўладальнікі таксама былі. Па нашых дадзеных, да 20%. Зараз, паводле папярэдніх ацэнак, гэтая лічба вырасце да 60%».