Да выходных у Беларусі пахаладае

На выходных беларусаў чакаюць замаразкі, мяцеліца і галалёдзіца.

Па словах начальніка службы гідраметэаралагічных прагнозаў Рэспубліканскага гідраметэацэнтра Змітра Рабава, сярэднямесячная тэмпература паветра на большай частцы тэрыторыі Беларусі чакаецца на 1 градус вышэй за кліматычную норму, толькі па паўднёвым усходзе - каля нормы.

Месячная колькасць ападкаў у снежні чакаецца ў межах сярэдніх шматгадовых значэнняў, перадае БелТА.

У аўторак, 3 снежня, на ўмовы надвор'я на тэрыторыі Беларусі будзе ўплываць вобласць павышанага атмасфернага ціску. У сувязі з гэтым чакаецца пераважна без ападкаў, толькі месцамі па поўначы краіны пройдзе невялікі снег. «Пры гэтым будзе даволі слізка», - адзначыў спецыяліст. У многіх раёнах на дарогах чакаецца галалёдзіца. Ноччу ва ўсходніх раёнах месцамі чакаецца ўзмацненне ветру з парывамі да 15-20 метраў за секунду. Тэмпература паветра ў начныя гадзіны складзе мінус 2-7 градусаў днём будзе ад мінус 2 да плюс 3.

З серады надвор'е ў Беларусі пачнуць вызначаць атмасферныя франты, якія змяшчаюцца з Балтыйскага мора праз тэрыторыю краіны.

У гэты дзень ноччу месцамі, днём на большай частцы тэрыторыі Беларусі пройдуць кароткачасовыя ападкі ў выглядзе дажджу і мокрага снегу. У начныя і ранішнія гадзіны ў асобных раёнах чакаецца слабы галалёд. Тэмпература паветра на працягу сутак складзе ад мінус 3 да плюс 3 градусаў.

У чацвер ноччу на большай частцы тэрыторыі краіны, днём месцамі пройдуць кароткачасовыя ападкі, у асноўным у выглядзе снегу, мокрага снегу. На асобных участках дарог захаваецца галалёдзіца. Месцамі прагназуецца ўзмацненне ветру з парывамі да 15-20 метраў за секунду. Тэмпература паветра ўначы складзе ад мінус 5 да плюс 1 градуса, днём - ад мінус 3 да 3 градусаў са знакам плюс.

Пачынаючы з пятніцы ўладу над надвор'ем возьме атлантычны цыклон з цэнтрам над Ленінградскай вобласцю. На тэрыторыю Беларусі пачне паступаць больш халоднае паветра паўночных шырот.

У пятніцу ноччу па паўночным захадзе, а раніцай і днём на большай частцы тэрыторыі краіны пройдзе снег, мяцеліца. Чакаецца ўзмацненне ветру з парывамі да 15-20 метраў у секунду. Месцамі на дарогах галалёдзіца. Тэмпература паветра ўначы складзе ад мінус 5 да 1 градуса са знакам плюс, днём - ад мінус 3 да плюс 2 градусаў.

У суботу часам будзе ісці снег, месцамі мяцеліца. Сіноптыкі абяцаюць узмацненне ветру з парывамі да 15-20 метраў за секунду, на дарогах - галалёдзіца. Тэмпература паветра на працягу сутак складзе ад 0 да мінус 6 градусаў.

У нядзелю на большай частцы Беларусі пройдзе кароткачасовы снег, закруціць слабая мяцеліца, на дарогах захаваецца галалёдзіца. Тэмпература паветра ўначы складзе мінус 3-8 градусаў, пры праясненнях апусціцца да 11 градусаў, у дзённыя гадзіны сіноптыкі абяцаюць мінус 1-6 градусаў.