Дзіцячыя садкі прымушаюць упрыгожваць хакейнай сімволікай

Менскім дзіцячым садкам загадалі упрыгожваць памяшканні на Новы год хакейнай сімволікай.

- Выхавальніца сказала, што ўжо падпісалася пад загадам, які прыйшоў у садок: ўпрыгожыць групы сімволікай чэмпіянату свету па хакеі, - распавяла «Комсомольской правде в Беларуси» адна з чытачак, дзіця якой ходзіць у адзін з садкоў Савецкага раёна. - Хэнд-мэйд, кажуць, не падыходзіць - трэба купляць усё новае. Звычайныя клюшкі таксама не падыходзяць. Мы прынеслі сцяжок за 12 тысяч з ЦУМа. Сказалі, што гэтага мала і трэба нешта большае. Прапаноўвалі раздрукаваць плакаты, але выхавальнікі сказалі, што трэба купляць менавіта афіцыйную прадукцыю.

Чаму трэба прыносіць афіцыйныя сувеніры, бацькам зразумела: правы на продаж сувенірнай прадукцыі турніру належаць кампаніі са Швецыі, якая іх выкупіла ў Міжнароднай федэрацыі хакея. Таму продаж беларускай сувенірнай прадукцыі будзе згорнуты за тры месяцы да чэмпіянату свету - дзесьці ў канцы студзеня.

Тым часам у Адміністрацыі Савецкага раёна Менска апраўдваюцца, што падобная «навагодняя» атрыбутыка - толькі рэкамендацыя, а зусім не загад. Маўляў, у садку перашчыравалі.

- Ёсць загад аб навагоднім афармленні ўстановы, дзе проста адным радком рэкамендуецца выкарыстоўваць сімволіку чэмпіянату свету-2014, - распавяла начальнік упраўлення адукацыі, спорту і турызму адміністрацыі Савецкага раёна горада Менска Інэса Сабаленка. - Цалкам можа быць так, што выхавальнік няправільна зразумеў гэтую інфармацыю і гэтак жа няправільна данёс яе бацькам. У нас пастаянна ўстановы аднаго раёна упрыгожваюцца ў адзіным стылі. У сувязі з надыходзячым чэмпіянатам у загад была ўключаная такая рэкамендацыя. А ўпрыгожванне можа быць рознае. Напрыклад, выцінанка на акне ў выглядзе хакеіста. Вось і ўсё.