Паводка ў Гомельскай вобласці: падтопленыя вёскі і дарогі
14- 25.02.2013, 11:41
Узровень вады ў рацэ Прыпяць па стане на мінулую нядзелю дасягнуў 498 см, гэта ўсяго на два сантыметры ніжэй небяспечнага ўзроўню ў 500 см.
Вада выйшла на пойму. Як паведамілі БелаПАН у прэс-службе Гомельскага абласнога ўпраўлення МНС, паводкавымі водамі ракі Прыпяць адбылося падтапленне падворкаў у вёсцы Пярэраўскі Млынок (Петрыкаўскі раён).
На рацэ Пціч, прытоку Прыпяці, у раёне гідрапаста вёскі Лучыцы Петрыкаўскага раёна ўзровень вады склаў 342 см, перавысіўшы небяспечную мяжу, якая складае 330 см, вада выйшла на пойму.
Каля вёскі Лучыцы падтоплена 100 метраў аўтадарогі Лучыцы - Хвойня (глыбіня 20-40 см). Праезд па дадзенай дарозе магчымы толькі транспартам павышанай праходнасці. Жыццядзейнасць у вёсцы Хвойня не парушаная.
У выпадку немагчымага праезду па дадзенай аўтадарозе маецца аб'язная дарога праз вёску Колкі (14 км). Пагрозы жылым дамам, гаспадарчым пабудовам, адміністрацыйным будынкам няма.