Беларускія прадпрыемствы не спраўляюцца з «імпартазамяшчэннем»

Кіраўніцтва «Гомельскага завода пускавых рухавікоў» вінавацяць у правале дзяржпраграмы па імпартазамяшчэнні.

Пра гэта кажуць вынікі праверкі, праведзенай Камітэтам дзяржкантролю. У прыватнасці, кантралёры ўстанавілі, што завод не выконвае Рэспубліканскую міжгаліновую праграму вытворчасці імпартазамяшчальнай прадукцыі. Таксама кіраўніцтва прадпрыемства абвінавацілі ў «безгаспадарчасці, неэфектыўным выкарыстанні ўласных і бюджэтных сродкаў пры інвестыцыях у асноўны капітал, неабгрунтаваным авансаванні камерцыйных структур, заключэнні загадзя нявыгадных дамоў, парушэннях дзеючага заканадаўства».

Так, да гэтага часу «Гомельскі завод пускавых рухавікоў» не прыступіў да рэалізацыі інвестыцыйнага праекта «Тэхнічнае пераўзбраенне электроднай вытворчасці з мэтай павелічэння аб'ёмаў вытворчасці і паляпшэння якасці імпартазамяшчальнай прадукцыі», распрацаванага таварыствам яшчэ ў 2010 годзе ў рамках Рэспубліканскай міжгаліновай праграмы арганізацыі вытворчасці імпартазамяшчальнай прадукцыі для будаўніцтва на 2009-2012 гады, і якая прадугледжвае павелічэнне аб'ёмаў вытворчасці зварачных электродаў ужо ў 2012 годзе да 2850 т у год (30% рынку), а да 2014 года - да 4800 т у год (50% рынка рэспублікі).

Па-ранейшаму выпуск электродаў зварачных вырабляецца на састарэлым абсталяванні, фактычная загрузка якога на працягу больш за 4 гадоў застаецца вельмі нізкай (15-17% ці 310-370 т у год пры наяўнай вытворчай магутнасці 2 тыс. т у год).

Пры гэтым павялічыць загрузку наяўных магутнасцяў завод не ў стане - спажыўцы электродаў (у асноўным прадпрыемствы будкомплекса) адмаўляюцца закупляць вырабленыя таварыствам электроды па прычыне іх нізкіх зварачна-тэхналагічных уласцівасцяў. Кажучы па-простаму электроды дрэнна гараць, што таксама пацверджана вынікамі іх выпрабаванняў у акрэдытаванай лабараторыі. Іх выкарыстанне не дазваляе выконваць якасна зварныя работы.

На думку КДК, кіраўніцтвам завода не прымаюцца дзейсныя меры па забеспячэнню загрузкі наяўных вытворчых магутнасцяў, уключэнню ў гаспадарчы абарот абсталявання, якое прастойвае, і невыкарыстоўваемых вытворчых плошчаў.

Так, на працягу 3-х гадоў загрузка вытворчых магутнасцяў таварыства па выпуску рэдуктараў, пускавых рухавікоў і зварачных электродаў не перавышае 15-40%, фактычна ў 2010-2012 г.г. 69% наяўнага абсталявання прастойвае, пры гэтым частка абсталявання ўжо дэмантаваная і разукамплектаваная (з 2004 года - 2 тэхналагічныя лініі па вытворчасці электродаў і 40 адз. непрыдатнага да эксплуатацыі металарэзнага абсталявання).

Сярод іншых прэтэнзій, якія прад'яўляюцца да кіраўніцтва завода, - адток кваліфікаваных кадраў і памяншэнне прыбытку.