Новая справа супраць Берлусконі: подкуп сенатара і праслушка

Новая крымінальная справа ўзбуджаная супраць Сільвіо Берлусконі, партыю якога на нядаўніх выбарах з мінімальным адрывам перамагла левацэнтрысцкая кааліцыя.

Пракуратура Неапалю абвінавачвае былога прэм'ер-міністра ў дачы хабараў, карупцыі і незаконным фінансаванні палітычных партый. Па версіі следства, Сільвіо Берлусконі прапанаваў 3 мільёны еўра сенатару Серджо дэ Грэгорыо. Ён хацеў забяспечыць пераход прэм'ер-міністра Рамана Продзі ў лагер правай апазіцыі. Продзі з'яўляўся членам левацэнтрысцкай кааліцыі, піша NEWSru.com.

У цяперашні час сейф для захоўвання каштоўнасцяў лідэра партыі «Народ свабоды» апячатаны і застанецца ў распараджэнні службы па фінансавых махінацыях да асобага распараджэння пракуратуры. У парламент быў пададзены запыт аб пачатку расследавання. Берлусконі таксама абвінавачваецца ў праслухоўцы тэлефонных запісаў і гутарак, паведамляе Corriere della Sera.

Былога прэм'ер-міністра Італіі Сільвіо Берлусконі ўжо абвінавачвалі ў фінансавых махінацыях, а таксама вылучалі супраць яго абвінавачванні ў карупцыі. Яго падазравалі ў подкупе брытанскага адваката Дэвіда Мілса з мэтай дачы ілжывых паказанняў у судзе дзеля Берлусконі, а таксама ў падатковым махлярстве, звязаным з яго прадпрымальнiцкай дзейнасцю, яшчэ да прыходу ў палітыку, адзначае «Газета.Ru».

Нагадаем, што супраць Берлусконі за апошнія 20 гадоў адкрывалася каля двух дзесяткаў спраў. Да восені мінулага года ўсе яны, у тым ліку пра сувязі з мафіяй, завяршаліся альбо апраўдальным рашэннем, альбо архіваваліся за даўнасцю, альбо зачыняліся за недахопам доказаў віны.

У кастрычніку 2012 года быў вынесены абвінаваўчы прысуд па справе Mediaset. Медыйная група Берлусконі купляла правы на паказ кінафільмаў праз іншыя фірмы, у прыватнасці, Mediatrade і RTI, надмерна павялічваючы пры гэтым закупачныя кошты. Розніца паміж сапраўдным і раздзьмутым коштам пераводзілася на рахункі ў банках Швейцарыі і Багамскіх выспаў, дзе такім чынам паўсталі «чорныя фонды». Берлусконі атрымаў чатыры гады турмы, аднак суд скараціў тэрмін па амністыі да 12 месяцаў. Аднак у тым, што і яго давядзецца адбываць былому прэм'еру, ёсць вялікія сумневы - прысуд абскарджваецца, а гэтая працэдура можа заняць у Італіі некалькі гадоў.