ААН просіць Украіну не выдаваць экс-прэм'ера Таджыкістана

Управа Вярхоўнага камісара ААН у справах уцекачоў звярнулася да ўкраінскіх уладаў з просьбай забяспечыць абарону былому прэм'ер-міністру Таджыкістана.

Пра гэта паведамляе прэс-служба арганізацыі.

У паведамленні гаворыцца, што ў адпаведнасці з міжнародным і ўкраінскім заканадаўствам, статус уцекача, які Абдумалік Абдуладжанаў атрымаў у ЗША, мае міжнародны характар, піша «Карэспандэнт».

«Гэта значыць, калі дзяржава прызнае чалавека як бежанца, то іншыя дзяржавы павінны паважаць гэта прызнанне статусу і забяспечваць надзейную абарону», - гаворыцца ў паведамленні.

У арганізацыі таксама адзначылі, што такая абарона павінна ўключаць папярэджанне гвалтоўнага вяртання ў краіну паходжання, дзе, як было ўстаноўлена, ён сутыкнецца з пераследам.

У ААН спадзяюцца, што Украіна не задаволіць запыт аб экстрадыцыі былога прэм'ера.

Нагадаем, 7 лютага, Барыспальскі суд арыштаваў затрыманага ў аэрапорце экс-прэм'ер-міністра Таджыкістана Абдумаліка Абдуладжанава да 17 сакавіка.

18 лютага Генеральная пракуратура Таджыкістана папрасіла Украіну выдаць былога прэм'ер-міністра краіны.

Нагадаем, Абдуладжанаў быў затрыманы міліцыяй у аэрапорце Барыспаль 5 лютага пасля таго, як ён прыбыў рэйсам Лос-Анджэлес - Амстэрдам - Кіеў. У міграцыйнай службе Украіны паведамілі, што Абдуладжанаў пакуль не звяртаўся па статус уцекача.