Генпракуратура разгледзіць пытанне аб выдачы Бакіева

Генпракуратура Беларусі атрымала запыт з Кыргызстана аб выдачы Курманбека Бакіева і будзе разглядаць яго на працягу месяца.

«Мы атрымалі запыт з генпракуратуры Кыргызстана, які тычыцца выдачы Бакіева, і ў адпаведнасці з заканадаўствам ён будзе разгледжаны на працягу месяца», - паведаміў агенцтву «Інтэрфакс-Захад» у пятніцу начальнік аддзела інфармацыі і сувязяў з грамадскасцю Генпракуратуры Пётр Кісялёў.

Як паведамлялася, 27 лютага ў адпаведнасці з патрабаваннямі Канвенцыі «Аб прававой дапамозе па грамадзянскіх, сямейных і крымінальных справах» Генпракуратура Кыргызстана ізноў звярнулася да сваіх калег з Беларусі з патрабаваннем экстрадаваць братоў Курманбека і Жаныбека Бакіевых для прывядзення выканання прысуду суда.

Прысуд Ваеннага суда Бішкекскага гарнізона ў дачыненні да былога прэзідэнта К.Бакіева і яго брата, экс-кіраўніка Службы дзяржаховы Ж.Бакіева ўступіў у сілу 22 лютага, паведамілі ў Генпракуратуры Кыргызстана.

Прысудам Ваеннага суда Бішкекскага гарнізона 11 лютага 2013 года Бакіевы асуджаныя па справе аб забойстве экс-кіраўніка адміністрацыі прэзідэнта Кыргызстана Медэта Садыркулава, Сяргея Слепчанкі і Кубата Сулайманава.

К.Бакіева суд прызнаў вінаватым у здзяйсненні злачынстваў, прадугледжаных артыкулам 304 Крымінальнага кодэкса, і прызначыў пакаранне ў выглядзе 24 гадоў пазбаўлення волі ў сукупнасці з канфіскацыяй маёмасці і адбываннем пакарання ў калоніі ўзмоцненага рэжыму, нагадалі ў Генпракуратуры.

Ж.Бакіева суд прыгаварыў да пажыццёвага пазбаўлення волі ў сукупнасці па шасці артыкулах з канфіскацыяй маёмасці. Акрамя гэтага, яго пазбавілі воінскага звання генерал-лейтэнанта.

«Раней намі ў Генпракуратуру Беларусі неаднаразова накіроўваліся хадайніцтвы аб выдачы Бакіевых для прыцягнення іх да крымінальнай адказнасці», - падкрэслілі ў Генпракуратуры Кыргызстана.

«Аднак хадайніцтва Генеральнай пракуратуры Кыргызстана аб выдачы вышэйзгаданых асоб для прыцягнення да крымінальнай адказнасці былі пакінутыя без задавальнення, паколькі, згодна з адказам беларускага боку, запыт аб іх выдачы звязаны з пераследам іх па палітычных перакананнях», - сказалі ў прэс-службе нагляднага ведамства.