У Брэсце «чысцяць» кадры

У мясцовым аблвыканкаме да насталай каляндарнай вясны сталі вакантнымі адразу некалькі ключавых пасад.

Як стала вядома charter97.org, сваёй пасады пазбавіўся намеснік старшыні аблвыканкама Мікалай Крывецкі, які адказваў за пытанні, звязаныя з энергетыкай, гандлем і сферай паслуг. Дарэчы, да гэтага ён доўгі час узначальваў першую ў Беларусі свабодную эканамічную зону «Брэст». Афіцыйная прычына, па якой Крывецкі пакінуў дзяржаўную службу - дасягненне пенсійнага ўзросту. Аднак чамусьці гэты фактар ніяк не адбіваецца на працягу «губернатарства» 64-гадовым Канстанцінам Сумарам.

Дарэчы, аднагодак Сумара - кіраўнік адміністрацыі Ленінскага раёна г. Брэста Міхаіл Еўтух - таксама адпраўлены ў адстаўку з-за ўзросту. Замену яму знайшлі ў самой выканаўчай «вертыкалі»: кіраваць адным з раёнаў абласнога цэнтра цяпер будзе Андрэй Клец, які да гэтага часу працаваў старшынёй камітэта эканомікі Брэсцкага аблвыканкама. Акрамя гэтай ключавой структуры няма цяпер начальніка і ў медыцынскай сферы Брэстчыны, пасля таго як у апошні дзень зімы Аляксандр Лукашэнка даў згоду на прызначэнне кіраўніка аблздарупраўлення Ігара Ласіцкага намеснікам міністра аховы здароўя.

Адзначым таксама, што неабходнасць атрымаць афіцыйнае адабрэнне ад кіраўніка спатрэбілася і для таго, каб членам Брэсцкага аблвыканкама стаў Віктар Іваноў, які займае пасаду 1-га сакратара абкама грамадскай арганізацыі, якой лічыцца БРСМ.